PR Lú Olo Nomeia Membru Governu Nain-2, Aban Simu Posse
Naunil Media (Díli), Prezidente Repúblika (PR), Francisco Guterres “Lú Olo”, liu husi Dekretu Prezidente Repúblika númeru 20/2022, nomea membru VIII Governu Konstitusionál na’in-rua atu simu posse bazeia ba proposta Primeiru Ministru.
Prezidente Repúblika uza nia kompeténsia konstitusionál tuir artigu 106 númeru 2 halo nomeasaun ba membru Governu bazeia ba proposta husi Primeiru Ministru.
“Membru Governu na’in-rua ne’ebé hetan nomeasaun husi Prezidente Repúblika mak hanesan Sekretáriu Estadu ba Terras no Propriedade, Eldino Rodrigues dos Santos, no Sekretária Estadu ba Igualdade no Inkluzaun, Maria do Rosario Fátima Correia”, dehan liu husi Komunikadu PR ne’ebé Naunil Média asesu iha Palásiu Prezidensiál Nicolau Lobato Bairru Pite, kuarta, (30/03).
Prezidente Repúblika, Franciso Guterres Lú Olo, sei fó posse ba membru Governu na’in-rua iha kinta feira, 31 Marsu 2022, tuku 9.30, iha Palásiu Prezidensiál Nicolau Lobato.
Liu husi Dekretu Prezidente Repúblika númeru 19/2022, bazeia ba proposta Primeiru Ministru nian, Prezidente Repúblika mós ezonera Sekretáriu Estadu ba Terras no Propriedade Mario Ximenes, no Sekretária Estadu ba Igualdade no Inkluzaun Maria José da Fonseca Monteiro de Jesus. *Jos
