Embaixada Austrália Ho MSSI Diskute Programa Bolsa Da Mãe
Naunil Média (Díli), Embaixada Austrália iha Timo-Leste (TL) ho Ministeriu Solidariedade Sosiál no Inkluzaun (MSSI) halo diskusaun ba programa bolsa da máe ba tinan ida ne’e.
Embaixador Australia ba Timor-Leste Bill Costello hateten, programa ida ne’e programa ne’ebé importante teb-tebes ne’ebé ohin diskute mak programa ida ne’ebé hanaran bolsa da máe.
“ Agora daudaun ami nia tekniku sira servisu maka’as tebes ho MSSI, atu hare’e oinsá inan sira bele asesu ba osan hanesan oinsa sira ba rejistu ho oinsá sira sei hetan pagamentu”. Dehan Embaixador Austrália ba Timor-Leste Bill Costello bá jornalista sira, hafoin sorumutu ho Ministra MSSI iha sala reuniaun G-VPM-MSSI Caicoli, segunda (4/4)
Embaixador Austrália ba Timor-Leste ne’e afirma, teknikamente ami halo servisu sira ne’e atu asegura katak, programa ne’e bele lansa iha fulan maiu tinan ida ne’e.
“ Programa ida ne’e sei hahú iha Munisípiu tolu hanesan Munisipiu Ainaro, Bobonaro no Regiaun Administrativa Espesial Oe-cusse Ambeno (RAEOA), ne’e hanesan ezemplu ida bainhira programa ne’e ita halo ho di’ak ita sei haluan liu tan iha Munisípiu hotu,” Tenik nia.
Enkuantu orsamentu ne’ebé mak Governu Austrália apoiu ba Timor-Leste ba programa ne’e ho totál hamutuk tokon 7 maibé transforma ba Dólar Amérika nia hetan tokon 5.
Iha sorin seluk Ministra MSSI Armanda Berta dos Santos, hato’o agradesimentu ba Embaixador Australia ba programa bolsa da máe jerasaun foun nu’udar investimentu di’ak ba futuru.
Ministra MSSI hakarak mós hato’o obrigado no agradese wain ba apoiu ne’ebé Governu Austrália halo ba povu Timor-Leste nia moris di’ak. LTS
