DNPDML Fasilita Formasaun ba Radiu Komunidade no Media Privadu
Naunil Media (Díli), Ministériu Assuntu Parlamentares Komunikasaun Sosial (MAPKomS) liu-husi Dirésaun Nasional Promosaun Dezenvolvimentu Média Lokal (DNPDML-Sigla Portugés) fó formasaun ba Radiu Komunidade no Media Privadu sira durante loron rua.
“Objetivu prinsipal atu haforsa koñesementu professional Media sira nian iha area rua, formasaun utilizasaun software no live report ba radio komunidade sira, tanba mundu modernu, entaun ita tenki adapta sistema ho Teknologia, tanba ema toman ona, ba podcast no YouTube karik iha software ruma, sei fahe iha formasaun atu fasilita media sira hodi divulga informasaun ne’ebe iha plataforma”, Dirétor DNPDML, Jóse Da Costa, ba jornalista sira iha hotel JL Villa, Fatuhada, Kuarta (06/04).
Nia informa, formasaun ne’e partisipa husi Radiu sanulu-resin hitu (17) husi Munisipiu sira no Media defisiensia inklui Radio Akademika no Media privadu sira kuaze sanulu resin (12), no Media husi SEKOMS nian hamutuk na’in-5.
“Kada media sira reprezenta ema na’in-1, hodi tuir formasaun ne’e, maibé balun la partisipa, tanba okupadu ho atividade seluk. Materia prinsipal mak Software no Live Report, ne’ebe mak formandu sira sei hetan husi orador sira durante loron rua”, tenik nia
Entretantu, Dirétor Jéral Ministériu Assuntu Parlamentares Komunikasaun Sosial (MAPKomS), Fonciano da Cruz Leite, hatete, mundu modern, presija adapta, hodi avansu iha fator hotu-hotu, inklui hahalok sira.
“Presija adaptasaun ho progressu dezenvolvimentu teknologia, informasaun no komunikasaun ne’ebe relevante ho situasaun atual, MAPKomS iha kompetensia atu hakbi’it media sira, ho modelu kapasitasaun no formasaun bele adapta teknolojia ne’ebe avansadu ho modern, kredibel”, argumenta nia
Nia dehan, MAPKomS liu-husi DNPDML kontinua involve radio komunidade sira hodi bele partisipa iha formasaun sira seluk sei tuir mai, atu ajuda jornalista radio nian, hodi avansa no utiliza software halo transmisaun direita.
“Formasaun ida ohin ne’e, importante tebe-tebes, atu hakbi’it ou fortaliza ba radio komunidade sira”, hakotu nia. LTS
