William Costello-Armanda Berta Diskute Programa Bolsa da Mãe
Naunil Media (Díli), Segunda (04 Abril 2022) ne’e, Embaixador Austrália iha Timor-Leste (TL), William Terrence Costello halo sorumutuk ho Ministra Solidariedade Sosial no Inkluzaun (MSSI) no Interina Primeira Ministra, Armanda Berta dos Santos, hodi diskute konaba programa Bolsa da Mãe ba tinan ida ne’e.
Hafoin sorumutuk iha sala reuniaun G-VPM-MSSI Caicoli, ba jornalista sira, Embaixador Austrália ba TL, William Terrence Costello, esplika programa refere hanaran bolsa da mãe jerasaun foun, atu reforsa familia sira hodi fo nutrisaun di’ak ba inan no labarik sira ne’ebé ki’ik.
“Daudaun tekniku sira servisu maka’as tebes ho MSSI atu hare inan sira bele asesu ba osan hanesan oinsa sira ba rejistu ho oinsá sira sei hetan pagamentu”, hateten William Terrence Costello
Diplomata ne’e dehan, programa ne’e bele lansa iha fulan Maiu tinan ida ne’e no ba munisípiu tolu.
“Programa ida ne’e sei hahú iha Munisípiu tolu hanesan munisipiu Ainaro, Bobonaro no Regiaun Espesial Oecuse Ambeno (RAEOA)”, tenik nia
Costello iha esperansa, implementasaun programa Bolsa da Mãe, ba munisípiu tolu mensionadu bele la’o ho di’ak no sai ezemplu ba munisípiu sira seluk.
Iha sorin seluk, Ministra MSSI Armanda Berta dos Santos, agradese ba bolsa da mãe jerasaun foun nu’udar investimentu di’ak ba futuru.
“Agradese wain ba apoiu ne’ebé Governu Austrália halo ba povu Timor-Leste nia moris di’ak”, hakotu nia
Konaba programa Bolsa da Mãe iha tinan ne’e, Governu Austrália apoiu fundus ba Timor-Leste hamutuk tokon 7, transforma ba dólar Amérika hetan tokon 5. LTS
