CNC Atribui Premiu Apresiasaun Bá Jornalista Radio Komunidade Hamutuk 15
Naunil Media (Díli), Sentru Nasional Chega (Sigla Português-CNC) ho Conselho de Imprensa Timor-Leste (Sigla Português-CI) fo prémio apresiasaun bá jornalista sira husi rádio komunidade sanulu resin lima (15) iha Maubise, Munisípiu Ainaro.
“Prémiu ne’e tuir lolos tinan kotuk fo ba kolega sira husi Radio Komunidade sira ba parseiru ne’ebe mak halo ona iha tinan kotuk liu-liu iha papel ne’ebe mak Centro CNC halo ba radio komunidade sira atu fasilita no transmite iha ida-idak nia municipiu,” Reprezentante Diretór CNC, Gaudêncio Soares, ba jornalista sira, iha salaun Parokiál Maubise, Kinta (31/03).
Tuir nia, jornalista hanesan vokasaun ida, tanba ema ne’ebé mak hakarak sai jornalista mak nia tenke fo an tomak hodi hala’o knar.
“Ami sei hare’e ita boot sira ninia produsaun no saida mak ita boot sira hakerek hodi kontribui ba pàz. tanba ne’e, CNC sei halo monitorizasaun ba ita boot sira nia produsaun ho premiu Maria Goreti nafatin Loke ba jornalista Sira iha tinan ida nee”, katak nia.
Nia haktuir, iha tinan kotuk husi jornal indepedenti, no husi media online Lafaek News mak hetan prémiu Maria Gorete.
“Hau enkoraja nafatin Jornalista sira atu produs nafatin produsan ida ne’ebé mak diak hodi kontribui ba paz dezenvolvimentu ba prémiu Maria Goreti iha jornalismo ba pàz”, tenik nia
Iha fatin hanesan, Jornalista Dulce Santina Belo, hanesan reprezentante rádiu komunidade, agradese tebes ba CNC durante ne’e halo ona ho kooperasaun ho rádiu komunidade sira hodi publika informasaun liu husi kanál radio nian.
“Ha’u agradese tebes tanba ida ne’e,hanesan prémiu apresiasaun ida mai ami sei la haluhan oinsá atu kontinua nafatin ami nia knaar hanesan Jornalista hodi kontinua partilla informasaun hanesan jornalizmu ba pàz hodi kontribui ba sobrevivencia”,hakotu nia.
Entretantu radio Komunidade ne’ebe mak simu premiu apresiasaun husi CNC kompostu husi radio Komunidade Matebian Baucau, Rádiu Komunidade Tokodede Likisá, Rádiu Komunidade Oe-kuse, Rádiu Komunidade Raihusar Aileu, Rádiu Komunidade Kafe Ermera, Rádiu Komunidade Lospalos, Rádiu Komunidade Povo Lospalos, Rádiu Komunidade Kovalima, Rádio Komunidade Maubise, Rádiu Komunidade Lian Tatamailau Ainaro, Rádio Komunidade Sahe Bukoli ho Radio Komunidade Lian manukoko Atauro. Ana
