Bilal Durrani : PR Sei Lansa Sentru Dezenvolvimentu Sedu
Naunil Media (Díli), Representante Nasaun United Nations Internationál Children’s Emergency Fund (UNICEF) iha Timor-Leste (TL) Bilal Durrani hateten Xefe Estadu sei lansa diretiva sentru dezenvolvimentu sedu.
Kestaun ne’e hato’o husi representante nasaun UNICEF iha Timor-Leste ba Jornalista sira hafoin remata enkontru ho Prezidente Repúblika (PR) José Manuel Ramos Horta iha palásiu Prezidensiál Nicolau Lobato Bairru Pite, Kinta (30/06).
“Prezidente katak nia sei lansa Diretiva Sentru Dezenvolvimentu Sedu ne’ebé nia mak sei lidera rasik, no sei inklui reprezentativa husi Gabinete Primeiru Ministru (PM), Ministra Saude, Ministru Edukasaun Juventude no Desportu, Ministra Sosial Solidaridade no Inkluzaun, no Ministru Administrasaun Estatal, no sira seluk,” dehan Representante UNICEF
Bilal Durrani hatutan Prezidente mós agradese ba servisu labarik sira nia iha Timor-Leste ne’ebé hahú restaurasaun independensia iha area saúde inan no labarik, nutrisaun, edukasaun, polítika, sosial no protesaun.
Nia hateten Xefe estadu mós dehan katak UNICEF sei sai parseiru xave hodi apoia iha governu nia implementasaun prioridade prezidensial principal sira hodi reduz malnutrisaun infantil espesialmente raes badak, liu husi investe iha loron 1.000 dahuluk , no oferese asesu ba pre – eskolar ba labarik hotu tinan 3 too 5.
Iha enkontru ne’e Prezidente Republika ho delegasaun husi UNICEF mós diskuti kona-ba estratejia komprovada no bazeia ba evidensia atu implementa Vizaun Prezidensial ba Timor – Leste ne’ebe laiha labarik ida mate wainhira moris mai, labarik hotu saudavel, nutrisaun diak, aprende no seguru.
Prezidente Repúblika mós sei lansa Sentru Dezenvolvimentu Labarik Sedu iha Palasiu Prezidente Nicolau Lobato, nune’e fornese servisu ba edukasaun pre-eskolar ba labarik sira idade entre tinan 3-5, suporta grupu inan hodi fornese servisu tratamentu ba malnutrisaun aguda, identifikasaun no intervensaun ba labarik sira ho defisiensia iha pre-eskolar, parenti pozitivu no saúde mental bazeia ba komunidade no apoiu psikolojia, rejistu moris hafoin inan-aman sira ba rejistu sira nia oan no simu sertidaun nasimentu (RDTL).*Jos
