Horta : PP La’ós Merkadu Maibé Hakarak Fornese Ai-fuan Ba Labarik
Naunil Media (Díli), Prezidente Repúblika PR José Manuel Ramos Horta hateten Palásiu Prezidensiál (PP) la’ós merkadu maibé Prezidente hakarak fornese Ai-fuan lokál ba labarik sira.
“Prezidénsia Repúblika hakarak fó-énfaze liután katak Palásiu Prezidensiál la’ós merkadu, maibé Prezidénsia Repúblika ida-ne’e hakarak fornese ai-fuan lokál ba labarik sira, ne’ebé nu’udar produtu lokál diretamente fa’an hosi ita-nia maluk ai-leba sira. Iha peskiza balun fó-sai katak labarik Timoroan sira la gosta han ai-fuan. Tanba ne’e, ho asaun fahe ai-fuan ba labarik sira ne’e, sai hanesan insentivu ida atu motiva labarik sira atu bele han ai-fuan sira,” dehan liu husi Komunikadu ne’ebé Naunil Média asesu iha palásiu Prezidensiál Nicolau Lobato Bairru Pite, Kinta (30/06).
Tanba ne’e hahú loron 20 Maiu 2022, hafoin serimonia solene komemorasaun Loron Restaurasaun Independénsia RDTL ba dala 20, Prezidente José Ramos-Horta autoriza Palásiu Prezidensiál nakloke ba sidadaun sira hotu-hotu, Prezidente Repúblika hakarak Palásiu ne’e nakloke ba labarik sira hodi tama, atu nune’e hatudu imajen ba públiku katak Palásiu ne’e besik liu ba povu, liu-liu ba labarik sira.
Relasiona ho hanoin no inisiativa sira Prezidente Repúblika nian ne’e, parte Prezidensia Repúblika rasik fó-atensaun maka’as ba inan isin-rua sira atu mai hetan ai-han nutritivu ruma no akompañamentu seluk tan iha Palásiu.
Prezidente Repúblika iha inisiativa mós atu loke kantina ida iha Palásiu Presidensiál atu sai nu’udar fatin ba diskusaun ho entidade sira hotu-hotu, porezemplu akadémiku sira, grupu agrikultura sira, juventude sira, no seluk-seluk tan.
Iha mós inisiativa hosi Prezidente Repúblika atu lori estudante sira mai Palásiu Prezidensiál iha kada Sesta-feira, hodi koñese kle’an liután divizaun servisu sira Palásiu Prezidensiál nian.
Prezidénsia Repúblika hakarak mós realsa tan ba públiku katak asaun umanitária sira ne’ebé hala’o ne’e sinkroniza tebes ho figura Prezidente Repúblika, José Ramos-Horta nian hanesan Premiadu Nobel ba Pás no membru Juri Konsellu Fraternidade Umana ne’ebé inisia hosi Amu Pápa Santu Francis.
Hanesan líder konsiliadór no dialogante ida, Prezidente Repúblika nu’udar Xefe Estadu hakarak tane aas tebes nasaun ida katak, valoriza dignidade pesoa umana ne’e nu’udar objetivu Estadu nian.
Antes ne’e iha loron 29 Juñu 2022 Deputadu Parlamentu Nasionál husi bankada FRETILIN, Fabião de Oliveira la konkorda ho inisiativa Prezidente Repúblika, José Ramos-Horta bainhira autoriza negosiante ai-leba sira ba fa’an ai-fuan iha resintu Prezidensiál, tanba hafoer de’it imajen Palásiu Prezidensiál. *Jos
