CNRT Preokupa Idade Reforma Ba Professor La Rezolve
Naunil Media (Díli), Representante povu iha uma fukun parlamentu nasional preokupa professor sira agora daudaun iha kriteria 3 mak hanesan permanente, kontratadu no voluntáriu liga ho rekrutamentu ne’ebe atu halo ba 995 professores, tanba kestaun profesores balu mate ona.
Deputada Bankada CNRT Lucia Taequi, hatete preokupasaun liga ba rekrutamentu professores, maibe oinsa ho professores sira ne’ebe mak hein hela atu reforma.
“Professor barak atu reforma maibe prosesu kleur tebes, tanba sa ME ho Funsaun Públika (FP) to’o ohin loron seidauk haree ba iha problema professores sira atu reforma”, dehan Deputada Lucia Taequi, iha sala plenaria Parlamentu Nasional, Tersa (05/07).
Nia afirma, professores balu mos reforma ona,maibe tanba sira nia osan retroativu seidauk hetan.
“Sira hein hela osan ne’e sai mak sira foin hakarak reforma”, katak nia
Bankada CNRT husu, ba Ministeriu Edukasaun, oinsa haree ba asuntu ida nee tanba balu too mate tiha deit lahetan reforma.
Nia Husu mos, ME oinsa atu halo lina koordenasaun ho funsaun publika hodi haree ba kestaun professores sira neebe mak hein hela atu tama ba reforma,”katak nia.
Iha fatin hanesan, Prezidente Parlamentu Nasional (PPN), Aniceto Guterres, informa, ida ne’e liga ba ida reforsa iha Funsaun Públika, agora seidauk iha lei.
Maibe aviza ona tinan ida liu ba atu deputada sira bele hola inisiativa atu bele define idade reforma iha funsaun públika.
Nia hatutan, ida nee sai problema tanba professores balu to’o mate deit, maibe fo reforma, tanba ne’e husu ME atu halo eplikasaun.
Hatan ba kestaun, Ministru Edukasaun, Armindo Maia, hateten, konaba professores ne’ebe idade atu tama reforma ME iha lista 1.478, sira ne’e idade tama reforma, se idade reforma obrigatoriu mak tinan 60, ida ne’e tinan ida tan sira tama ona ba reforma.
Nia sublina, kestaun iha ME la’os iha ME deit, maibe iha mos ministeriu seluk katak, reforma ne’e seidauk tama iha obrigatoriu, ne’ebe professores sira balu iha hela kredit iha banku sira dada atu nune bele selu kreditu ho argumentu seluk tan.
“Ami bazeia ba lei kona ba idade reforma, mak ami sei ble halo fali dekretu lei ruma ba iha edukasaun, katak idade reforma mak nee tenke obrigatoriu tenke reforma. Maibe karik iha area disiplina neebe mak presiza, sira reforma maibe bele iha aranja seluk professores, tanba iha joven barak mos agora prontu atu hanorin”,hakotu nia. ANA
