Taur Apela Populasaun Lalika Pániku Rona Buatus Mina Laiha
Naunil Media (Dili), Primeiru Ministru (PM) Taur Matan Ruak apela ba populasaun sira atu Lalika paniku rona buatus dehan mina laiha tanba guvernu konfia empreza sira ne’ebé mak dadaun ne’e hala’o hela aktividade.
Kestaun ne’e hato’o husi Xefe Guvernu ba Jornalista sira hafoin remata enkontru semanal ho Prezidente Repúblika (PR) José Ramos Horta iha palásiu Prezidensiál Nicolau Lobato Bairru Pite, Kinta (28/07).
“Entaun ha’u apela ba populasaun sira Lalika paniku, uluk situasaun pior ida ne’e mós ita jagoan loos agora mina atu ita halai monu mate aan tiha, mina laiha para tiha motor kareta la’o ain, ami la’o tinan 20 iha ailara ami bele agora imi la’o fali ladiak ida ne’e mós ha’u informa ba Prezidente Repúblika,” dehan Xefe Guvernu
PM Taur mós informa ba Prezidente Repúblika kona-ba buatus ne’ebé dadaun la’o katak iha Dili laran mina sei maran, nune’e xefe Guvernu ne’e mós husu ba xefe estadu atu Lalika preokupa tanba guvernu konfia empreza ne’ebé hala’o aktividade.
“Ha’u informa mós ba sua excelensia Prezidente Repúblika kona-ba buatus sira ne’ebé agora la’o iha Dili laran katak mina sei laiha, mina sei maran, entaun ha’u dehan ba sua excelensia Prezidente katak ita Lalika preokupa, tan Primeiru ita sei konfia iha empreza sira ne’ebé halo hela sira nia aktividade mas, enkazu estreminisidade guvernu iha empreza estatal ida Timor Gap bele ativa tanba ne’e tenke a ver seguransa ho ita nia Nasaun nian,” katak PM Taur
Taur esplika ohin ministeriu Petroliu mós informa ona ba Primeiru Ministru katak dadaun ne’e pertamina nia Ró boot ida lori kuaze 4 miloens de litrus gazoel no gazolina iha ona tasi laran sira diskarega orsida loraik no aban problema ida ne’e laiha ona.
Iha enkontru semanal ne’e Xefe Guvernu mós informa ba Prezidente Repúblika kona-ba akordu ne’ebé Timor-Leste iha ho MCC ne’ebé konsellu Ministru aprova haruka ba Parlamentu Nasionál para atu ratifika, no mós investimentu sira ne’ebé guvernu halo tantu iha Dili no mós iha Munisípiu balun oinsá mak hadia bee sira.
Assuntu ikus iha enkontru entre líder orgaun rua ne’e mak haree uituan kona-ba oinsá ba oin naturalmente PR husu gabinete para prepara hela relatoriu para sheare ho guvernu oinsá mak bele halo followap assuntu no akordu sira ne’ebé trata no assina iha Indonézia para haree pasu ba oin ne’e nusa.*Jos
