MAE Konvida Populasaun Marsa Hamutuk Hodi Selebra 30 Agostu
Naunil Media (Díli), Atu komemora loron konsulta populár 30 de Agostu mak Ministeiriu Administrasaun Estatal Konvida populasaun sira iha Díli laran konsentra hamutuk iha rotunda saudozu Francisco Xavier do Amaral atu marsa hamutuk hodi selebra 30 de Agostu.
Kestaun ne’e hato’o husi Ministru Administrasaun Estatal (MAE) Miguel Pereira de Carvalho ba jornalista sira hafoin enkontru ho Prezidente Repúblika (PR) José Ramos Horta iha Palásiu Prezidensiál Nicolau Lobato Bairru Pite, sexta (26/08).
“Iha dia 30 de Agostu ha’u informa ba Prezidente Repúblika katak komisaun organizadora Konvida ema hotu inklui populasaun sira ne’ebé hela iha Díli parake entre 7:30 to’o 8:00 ita hotu bele konsentra iha rotunda saudozu Francisco Xavier do Amaral nian, para halo marsa ida husi resintu rotunda too iha Santa Cruz no sei tun fali ba remata iha jardim 5 de Maio,” dehan MAE.
Prezidente komisaun organizadora ba 30 Agostu ne’e hatutan, Iha jardim 5 de Maio mak serimónia ne’e kulmina iha ne’ebá no mós hato’o ona pedidu ida ba Prezidente Repúblika para prefere diskursu ida iha ne’ebá fo mensajen ba nasaun kona-bá loron importante ne’e.
Membru governu ne’e hateten Prezidente Repúblika mós disponivel para atu bele marka prezenja iha jardim 5 de Maio para atu bele hato’o preves plavaras iha serimónia ida ne’e.
Miguel Pereira mós Konvida populasaun hotu liuliu sira ne’ebé hela iha Díli parake iha dia 29 loraik tuku 4:00 bele hakbesik ba katedral iha Díli hodi asiste misa agradesementu no misa remata sei ba kari aifunan iha Palásiu governu nia oin iha tasi ibun.
“Iha 30 dadersan 7:30 ha’u Konvida populasaun sira hotu iha Dili laran para atu bele hakbesik ba resintu rotunda saudozu Francisco Xavier do Amaral iha área CCD, para ita halo marsa ida ba to’o iha jardim 5 de Maio to’o iha ne’ebá mak prezidente Repúblika sei halo diskursu iha ne’ebá,” katak Miguel Pereira.
Nia dehan, Orsamentu ne’ebé previstu ba aktividade 30 de Agostu ne’e besik (noventa mill dolares Amérikanu) ida ne’e dispeza sira besik ona fulan ida, hanesan eventu Desportu iha suku, postu administrativu no mós eventu semináriu nasionál ke agora la’o hela iha CCD, marsa saúdavel, misa no sira seluk tan. *Jos
