CNE Realiza Formasaun Konjunta Prepara Matéria Metodolózia
Naunil Média (Díli), Tersa (28/07) ne’e, Komisaun Nasionál Eleisoens (CNE-Sigla Português) realiza formasaun konjunta ba formadór sira hodi prepara matéria metodolózia no konsolida matenek atu hakbi’it kna’ar CNE liu-liu aktus eleitorál.
Prezidente CNE, Alcino Barris, hateten aleinde atu eleva kapasidade formadór sira nian, aktividade ne’e mos prepara planu estratéjiku nu’udar matadalan.
“Formasaun konjunta ida ne’e hodi konsolida diak liu-tan ita nia matenek ne’ebé hakbi’it tomak iha ita nia kna’ar hanesan Komisaun Eleisaun Nasional ne’ebé ligado liu ba aktus eleitoral”, Prezidente CNE, Alcino Barris, ba jornalista sira iha Salaun CNE, Tersa (28/07).
Prezidente CNE, Alcino Barris, informa partisipante iha formasaun konjunta ne’e mai husi reprezentante sira CNE husi Munisípiu-12 no Rejiaun Administrativa Espesiál Oe-Cusse Ambeno no Zona Espesiál Ekonommia Sosiál Merkadu (RAEOA-ZEESM).
“Ema (formadór) hirak ne’e mai husi munisípiu 12 inklui mós Oe-Cusse. Ita nu’udar segmentu ne’ebé hatur kedas iha ita nia Planu estratejiku pilar ida tenke eleva kapasidade CNE”, tenik Prezidente CNE, Alcino Barris.
Alcino Barris, informa CNE hahu halo ona edukasaun sívika ba estudante sira, nune’e ho aktividade formasaun konjuta ne’e atu haree fali ba motodolózia formadór sira nian.
“Ami halo edukasaun sívika iha fatin hotu, edukasaun sívika ida ne’e haree fali ba metadolózia formadores no pratisipante sira atu diskute fila fali, tanba edukasaun sívika ne’ebé hala’o liu-ba ne’e halo ba eskola de’it”, informa Prezidente CNE, Alcino Barris.
Ikus-liu, Nia dehan, tenke matéria ne’ebé apropriadu atu aplika no transmite ho didiak. Ana
