Estrutura PD Vizita Arcenio Bano iha Oe-Cusse

Fahe Tutan

Naunil Media (Oe-Cusse), Segunda (27/07) ne’e, estrutura Partidu Demokrátiku (PD) hala’o vizita kortezia ba Prezidente Autoridade Rejiaun Admistrativa Espesiál Oe-Cusse Ambeno no Zona Espesiál Ekonomia Sosiál Merkadu (RAEOA-ZEESM), Arcenio Paixão Bano hodi aprezenta PD nian aktividade durante iha rai-ketan. 

Prezidente PD, Mariano Assanami Sabino, hateten vizita kortezia ne’e aprezenta PD nia aktividade konsolidasaun durante iha RAEOA no aprezenta mos kuadrus sira husi PD nian iha RAEOA.

“Primeiru PD halo nia konsolidasaun, esplika mos konaba aktividade partidu, apresenta kuadrus sira iha RAEOA hodi bele hatene katak ida ne’e maka legalmente elizitimu iha ne’e”, Mariano Assanami Sabino, ba jornalista sira hafóin hasoru malu ho Prezidente Autoridade RAEOA, Arcenio Paixão Bano iha edifisiu ZEESM, Sakato Oekusse.  

Segundu, líder polítiku PD ne’e, akresenta komitmentu ba apoiu programa hotu ne’ebé mak la’o iha RAEOA tanba inísiu LASAMA sei Prezidente Parlamentu.

“Nia (LASAMA) apoiu no hanoin tomak para ZEESM ne’e bele lao, programa sira iha RAEOA ne’e tenki la’o ho diak, tanba ne’e  tenki  fó apoiu liu-liu ba seitór sira hanesan seitór agrikula, Saúde, Edukasaun nomós seitor sira seluk, iha parte infrastrutura hare liu-ba Bee moos, Estrada ho Eletricidade sira ne’ebé seidauk remata”, tenik Assanami.

Assananmi hatutan PD iha komintementu tomak ba partidu nu’udar bankada partidu demokratiku iha Parlamentu sempre fó apoiu ba programa sira ne’e bele aselera no la’o ho diak  nu’une Atoni-oan sira bele hetan benifisiu husi ida ne’e.

Prezidenti autoridade RAEOA, Arcenio Paixão Bano, hateten autoridade RAEOA autoridade ba ema hotu, prontu simu opiniaun hotu-hotu husi partidu ne’ebé deit tama mai Oe-Cusse tanba ne’e atu hadia Oe-Cusse nia Futuru.

“Oe-Cusse hanesan rejiaun autónomia ida, ami simu partidu hotu-hotu nia opiniaun tanba ne’e atu lori Oe-Cusse sai di’ak-liu ba ema hotu, partidu saida dait mak mai hala’o aktividade, ami simu iha ne’e husi prezidente to’o nia estrutura sira hotu sai autoridade ba ema hotu, tanba ne’e ami simu partidu hotu-hotu”. Dehan Arcenio Bano. Uar

Leave a Reply

Your email address will not be published.