Autoridade Suku Bibileo husu Estadu TL Rekuiñese Masakre Kraras
Naunil Media (Viqueque), Xefe Suku Bibileo, Maria Odete dos Anjos Amaral, husu ba Governu no Estadu Timor-Leste (TL) atu rekuiñese masakre Kraras (8 Agostu no 17 Setembru) hodi hasa’e meia bandeira ka sai loron istóriku nasionál.
“Masakre Kraras akomtese iha levantamentu ‘Penbunuan Masal’, iha suku Bibileo no iha fatin Tau Been, maibé estadu seidauk rekuñese, karik tanba iha momentu ne’eba jornalista la iha, mak to’o ohin loron Estadu seidauk rekuñese”, Xefe Suku Maria Odete dos Anjos Amaral, ba Naunil Media hafoin akompaña nia komunidade kbi’it laek simu nesesidade bázika husi ekipa Tour F-FDTL, iha suku Bibileo, Kurta (10/08).
Xefe Suku Bibileo, informa durante ne’e autoridade suku no aldeia hamutuk ho kumunidade selebra masakre Kraras ho aktividade oi-oin maske kbi’it finanseiru laiha.
“Loron 8 fulan Agostu no 17 Setembru 1983 levantamentu iha Kraras (masakre), atu reelembra akontesementu ida ne’e, ami sempre selebra maske ami la iha kibi’it fundus”, informa xefe suku Maria.
Xefe Suku Maria Odete dos Anjos Amaral, hateten ohin loron Timor-Leste iha naroman, maibe povu Bibileo sente sei nakukun no triste tanba Estadu seidauk fó importansia ba Masakre Kraras.
“Ami hato’o bei-beik ona ba estadu hodi tau importasia ba loron 8 fulan Agustu no 17 Setembru 1983 akontese levantamentu Kraras, maibé ami povu Bibileo sente triste tanba estadu seidauk rekuñese”, preokupa xefe suku feto ne’e.
Tui Nia, Masakre Santa Cruz Díli akontese ikus, maibé estadu Timor-Leste rekuiñse ona, enkuantu Masakre Kraras akontese uluk maibe estadu la tau importansia hodi rekuiñese. Vit
