Adalzija Espera Tinan Oin TL Hanesan Membru Plenu Direitu Ba ASEAN
Naunil Media (Díli), Ministra Negósiu Estranjeiru Kooperasaun (MNEK), Adaljiza Magno espera loron Asean ne’ebé halo ona ba tinan 55 ne’e hanesan tinan ikus ba Timor sai membru, maibé ema hotu hein katak tinan oin Timor-Leste (TL) partisipa hanesan membru plenu direitu ba Asean.
“Parabens, parabens ba loron Asean ba tinan lima-nulu resin lima (55) espera katak ida ne’e tinan ikus timor partisipa hanesan la’ós membru, ita hotu-hotu espera katak tinan oin ita partisipa hanesan membru plenu direitu ba Asean nian,” dehan MNEK Adalzija Magno ba Jornalista sira hafoin partisipa aniversariu ezisténsia ASEAN nian ba dala 55 iha Embaixada Thailandia, Motael, segunda (15/08).
Membru guvernu ne’e hatutan foin dadauk sira ba Kambodia partisipa reuniaun Asean Forum no reuniaun entre ministeriu negósiu estranjeiru Asean, nune’e Primeiru Ministru Kambodia anunsiu ona katak sira sei formaliza Timor-Leste nia adezaun ba Asean iha tinan oin.
“Foin dadauk ami ba iha Kambodia Asean Forum no mós iha reuniaun Ministeriu Negósiu Estranjeiru paizes Asean nian, entaun Primeiru Ministru Kambodia nian halo anunsiu katak, sira iha intensaun atu formaliza Timor-Leste nia adezaun ba Asean tinan oin,” katak membru guvernu ne’e
Nia dehan bainhira halo anunsiu no sira halo tan anunsiu formál tinan ne’e, Timor-Leste hein de’it fin do ano ne’e, sira sei hateten saida, ne’e duni que agora TL tenke prepara aan atu bele preparadu liu tan kuandu sai full members of Asean.
Iha fatin hanesan Prezidente Repúblika (PR) José Ramos Horta hateten Asean apezar problema oi-oin iha dezenvolvimentu maibé ASEAN sai modelu no Parseiru boot iha mundu tanba rai 10 ASEAN manan influénsia prestiju boot.
“Apezar nafatin iha problema oi-oin, problema dezenvolvimentu, ASEAN sai Parseiru boot, modelu boot iha mundu hotu-hotu hanesan Estadus Unidus, Índia, China, Rúsia ho Uniaun Europeia, Canada, Japaun, Koreia, Austrália sira hotu-hotu sai Parseiru dialogu ASEAN nian, ne’e hatudu rai sanulu ASEAN manán influénsia prestiju boot,” tenik Prezidente Repúblika
Xefe Estadu hateten kondisoens Timor-Leste kumpri ona tinan lubuk ida nia laran la’ós 100% nunka bele 100%, maibé kondisoens ne’ebé TL kumpri, iha dezenvolvimentu ekonómiku, infrastrutura, rekursu umanus, Timor-Leste nia esperiénsia internasionál, organizasaun internasionál barak hanesan Nasoens Unidas, G7+ Timor-Leste lidera iha mós parte balun internasionál. *Jos
