SEPFOPE-Japaun Fasilita Formasaun Ba Timoroan Ba Servisu Iha-Japaun 

Naunil Media (Díli), Prezidente CWP Kon Yosuke hateten, Governu liu-husi Sekrétariu Estadu Profesionál Empregu (SEPFOPE sigla portugés),  ho reprezentante governu Japaun realiza enkontru, atu fasilita formasaun  ba Timor oan sira atu ba servisu iha Japaun iha área IT no bee foer ba bee moos.

“Ohin loron ami mai halo enkontru iha ne’e hodi hatene oinsá mak ita bele halo hanesan formasaun sira ne’ebé mak kapasita Timoroan sira, no ami buka oportunidade atu fó formasaun ba Timoroan sira hodi halo dezenvolvimentu iha Timor-Leste, no mós halo iha Japaun hotu”, dehan Prezidente CWP Kon Yosuke ba jornalista hafoin remata asina akordu iha Salaun SEPFOPE Caicoli, kuarta (21/09).

Nia hatutan, Governu Japaun hakarak komesa fó formasaun ba Timoroan iha área bee moos no bee foer.

Enkuantu iha Japaun ami hakarak Timoroan sira servisu iha área hanesan IT no teknólojia hodi halo sistema ne’ebé di’ak liu tan.

“Ami nia kompaña foin mak harii seidauk to’o tinan, ne’ebé ami hein katak tinan oin hahú ituan-ituan”, dehan nia.

Iha fatin hanesan Diretór Jerál SEPFOPE Paulo Alves hateten, Ohin ita realiza enkontru ida ne’e atu ko’alia ba sira, tanba sira iha planu atu fó formasaun ba sistema bee moos nian iha Timor-Leste.

Aleinde ne’e sira mós ba vizita ona suku ida iha Urahou ne’ebá, tanba sidade ida naran sidade ONO ne’ebé mak fó projetu ida ne’e liu husi JICA, i sira sei halo estabelesimentu sistema bee moos nian iha Urahou, nia dehan.

Entaun aumesmu tempu kompaña ida naran Kansei ne’ebé mak suporta sira CWP, ne’e sira hakarak iha mós planu atu rekruta tan Timo oan atu ba servisu iha Japaun, ba iha área sistema IT no bee moos ninian, oinsá halo jestaun bee foer ba bee moos iha Japaun ninian, hakotu nia. LTS