PM Taur Vizita Dahuluk Ba Rai Li’ur
Naunil Media (Díli), Loron 06 fulan-Fevereiru, tinan 2023 Sua Exelénsia Primeiru-Ministru Taur Matan Ruak segunda ohin dezloka ba Commonwealth Austrália, iha nia vizita ofisiál dahuluk ba rai li’ur.
Vizita entre loron 06 to’o 09 fulan Fevereiru ne’e, ho objetivu atu hametin liu tán relasaun bilateral no kooperasaun ho Austrália hanesan nasaun viziñu.
Enkuantu Objetivu vizita ne’e nian mós atu agradese ba Governu no povu Australianu ba sira-nia apoiu no ba Governu Timor-Leste durante mandatu VIII Governu Konstitusionál nian, liuliu iha situasaun Covid-19, hodi apoiu vasina no espesialista sira mai Timor-Leste, no inklui mós apoiu ba kalamidade ne’ebé akontese iha tinan 2020 no 2021.
“Durante estadia iha Austrália, Xefí Governu Timor oan sei hasoru malu ho nia omólogu Australianu, Anthony Albanese, sei halo enkontru kortezia ho Governadór Jerál, David Hurley, no ho personalidade importante sira seluk País ne’ebá nian”. Dehan iha nia komunikadu ba jornalista iha Aeroportu, segunda (6/2)
Entretantu Vizita Xefí Governu nian ne’e loloos hala’o iha fulan-fevereiru, tinan 2022, maibé tanba Sua Exelénsia Primeiru Ministru pozitivu tiha COVID-19, nune’e vizita refere adia tiha no foin bele realiza fali.
Nune’e iha vizita ne’e, Xefí Governu sei hetan akompañamentu hosi Ministra Negósius Estranjeirus no Kooperasaun, Sra. Adaljiza Magno.
Xefe Governu ho delegasaun sei to’o fali rai laran iha loron 10 fulan-fevereiru, tinan 2023. LTS
