SEKomS Expedito : Governu fó Atensaun no Promove Kreatividade Foinsa’e
Naunil Media (Díli), Sesta (20/10) ne’e, Sekretáriu Estadu Komunikasaun Sosiál (SEKomS), Expedito Loro Dias Ximenes, partisipa workshop ne’ebé organiza husi Casa Produção Audiovisual (CPA) ne’ebé involve youtubers foin-sa’e timoroan sira.
Iha workshop ne’e Sekretáriu Estadu haktuir programa governu konstitusionál da-sia iha setór komunikasaun sosiál no subliña atensaun sira ba promove kreatividade foin-sa’e inklui feto no labarik sira.
Youtubers sira subliña preokupasaun oioin inklui husu ba governu liuhusi Sekretaria Estadu Komunikasaun Sosiál atu halo kooperasaun ho Youtube atu nune’e bele loke filial (kantor cabang) iha Timor-Leste.
Youtube hanesan teknolojia ne’ebé fó sai konteudu video ne’ebé produz husi kreadór inklui filme, klipe TV no video múzika.
Sekretáriu Estadu hatete, prosesu ida ne’e sei servisu hamutuk ho parte relevante sira no fiar katak sei iha kooperasaun ne’ebé la’ós de’it ho youtube maibé mós google atu nune’e fasilita merkadu teknolojia iha Timor-Leste.
Sekretáriu Estadu husu atu foin-sa’e sira kontinua kreatividade ne’ebé iha hodi produz barak liu-tan kontiudu inspitrativu sira no motiva malu nafatin ho lingua oioin hodi manan merkadu dizitál iha mundu.
“Ita buka, iha dalan atu Youtube ho Google bele mai iha Timor.” Sekretáriu Estadu subliña kestaun ne’e bainhira sai oradór iha workshop ho Tema: “𝗝𝘂𝘃𝗲𝗻𝘁𝘂𝗱𝗲 𝗧𝗶𝗺𝗼𝗿𝗲𝗻𝘀𝗲 𝗶𝗵𝗮 𝗧𝗲𝗺𝗽𝘂 𝗔𝗴𝗼𝗿𝗮”.
Youtubers sira mós hato’o preokupasaun kona-ba kontinuasaun husi kompetisaun kreator Youtube ne’ebé governu anterior organiza maibé la kontinua.
Sekretáriu Estadu hatan katak presiza haree fila-fali mekanizmu ne’ebé di’ak liu hodi garante programa ne’ebé de’it tenke iha sustentabilidade. */Kou
