Lere: Jardin Heroi Metinaru Sai Ona Fatin Samfradu
Naunil Media (Dili), Xefe Estadu Maior das Falintil-Forca Defeza de Timor-Leste (F-FDTL), Tenente Jeneral Lere Anan Timur, konsidera Jardin dos Herois Nasional da Patria Metinaru sai ona fatin samfradu, tanba “Milisia” sira mos hakoi hamutuk ona ho heroi Nasional sira.
Tenente Jeneral, informa lia hirak ne’e, hafoin partisipa serimonia Funebre, Saudozu Tenente Coronel, Domingos da Costa Santos ho Kodigu, “Domi” iha jardin dos herois da patria Asalainu, Kinta, (18/11/).
Ho nune’e Lere hateten, Jardin dos herois da patria Munisipiu Lautem ne’e, Ponta Leste nian ne’e tenke sai fatin jardin dos herois duni, labele sai fali fatin sanfradu hanesan Jardin dos Herois iha Metinaru.
” Fatin ida ne’e bolu Jardin dos Herois Ponta Leste nian, tenke sai Jardin dos Herois duni, labele sai hanesan Jardin dos Herois iha Metiaru, ema Milisi traidor mos mai hakoi hotu iha ne’eba,” Tenik Lere.
Atu labele komete tan sala ne’ebé iha jardím dos Herói Metinaru, Lere husu ba Konsellu Kombatentes da Libertasaun Nasional Municípiu Laútém, atu kontrola didi’ak jardím dos Heróis ida ne’e, nune’e bele sai Jardím dos Herois loloos.
” Atu labele monu ba sala ne’ebé ita komete iha Metinaru, iha ne’e Konsellu Municipiu mos iha, tenke organiza didiak, 24 anos nia fatin mak ida ne’ebé, kuadru politiku nia fatin mak ida ne’ebé, Militar nia fatin mak ida ne’ebé, klandestina nia fatin mak ida ne’ebé la’os kahur malu, ita la hatene ida ne’ebé mak sé.
Nia mos hateten katak, Dalaruma ema ida ne’ebe Milisi nia familia servisu iha konsellu dos veteranus mak fasilita mai iha ne’e, se ita dehan katak jardím dos Heróis ne’e tenke jardím dos Heróis duni.
Ikus liu Lider maximu F-FDTL, akresenta, ponta Leste naran bo’ot iha funu laran , iha ukun a’an ida tenke morin nafatin, nune’e tenke kontrola didi’ak Jardím Ponta Leste, atu ema bele banati. Latu
