Eskola Colegio Paulo VI Hala’o Ezame Trimestre Dahuluk
Naunil Media (Díli), Vise Diretur Colegio Paulo VI, Atanasio António Silva, hateten Segunda (22/06) ne’e, realiza ona ezame trimestre dahuluk ba estudante sira, tanba hetan ona autorizasaun husi Ministériu Edukasaun Juventude no Desportu.
“Ami nia eskola Colegio Paulo VI atinji ona kriteria Pandemia COVID-19, tanba ne’e ami atu reativa prosesu aprendijazen, maibé planu hahu kedas ho ezame primeiru periodu. Nafatin realiza ezame primeiru periodu, tanba antes tama ba estadu emerjénsia, ami nia pontus de ezame prontu tiha ona”, Vise Diretur Colegio Paulo VI, Atanasio António Silva, ba Naunil Media iha nia kna’ar fatin, Bairos dos Grilhos, Kinta (25/06).
Vise Diretur eskola ne’e informa, eskola Colegio Paulo VI iha nia salas de aula sufisiente no priense rekéjitu sira hosi Ministeriu Saúde (MS) no Organizasaun Mundiál Saúde (WHO-Sigla Ingles).
“Ami nia salas de aula hetan ona desenfeta husi Cruz Vermelha de Timor-Leste (CVTL) iha semana kotuk. Ami mos prepara ona fatin fase liman iha aula oin hodi priense tuir regra Word Health Organization (WHO)”, esplika Nia.
Nia esplika, iha sala de aula ida ema nain-20 mak tama, maibe hafoin sorumutuk ho ho Ministeiru Edukasaun Juventude no Desportu nian, sira konkorda hamutuk kada aula ida ema bele tama to’o nain-40.
“Eskola Colegio Paulo VI sei laiha feriás, nune’e Segunda semana-oin sei konsentra ba hahu aktividade aprendijazen nian”, dehan Nia.
Estudante ne’ebé dadaun iha eskola Colegio Paulo VI, Sekundáriu hamutuk 1.143. Pre-sekundáriu hamutuk 500 no eskola refere iha sala de aula hamutuk 30. Jjf
