Lei Kriminaliza Difamasaun Defende Koruptor
Naunil Media (Díli), Prezidente Partidu Trabalhista, Ángela Freitas la Konkorda Esbosu Lei Kriminaliza Difamasaun, tamba konsidera lei ne’e atu defende koruptor sira no taka dalan ba povu nia kritika.
“Polítika Lei Kriminaliza Difamasaun hodi hanehan tiha povu, kaptura povu ki’ik, kondena ema konforme sira nia vontade. Timor oan pertense nasaun ne’e rasik, saida mak akontese, sidadaun hotu iha direitu atu hato’o nia espresaun, entaun komesa husi Povu ai-leba nia oan to’o Prezidente Repúblika, iha direitu atu koalia”, hateten Prezidente Partidu Trabalhista Ángela Freitas, ba jornalista sira iha sede Trabalhista Akait, Sesta (26/06/2020).
Tuir Ángela, lei ne’e mak aprova duni, bele prejudika sidadaun sira nia direitu, tamba laiha ona protestu bainhira líder sira halo sala.
“Se agora ida ne’e mak ita kriminaliza difamasaun, ita taka hotu ema nia ibun para labele koalia, entaun sira ida grupu manipula tiha polítika lei ne’e, nune’e sira hodi nauk tuir sira nia hakarak” tenik Ángela.
Nia dezafia sidadaun hotu labele nonok bainhira pol’itika nain sira atu kria lei ne’e, tamba lei ne’e sei hamate ema ki’ik nia direitu no fo benefisiu deit ba ukun nain sira.
“Hanesan sidadaun Timor oan tenke hamriik kontra kriminaliza difamasaun, husu mos públiku hamriik hodi defende povu kiik nia direitu, Liberdade ba ema hotu, la’os Liberdade ba fali bo’ot sira hodi habokur an tiha, nune’e hanehan fali povu lian laiha. Públiku tenke hamrik foti asaun kontra Ministru Justisa ka Governu hodi abaixu kriminaliza difamasaun”, dehan nia.
Ikus-liu, Ángela, dehan “pior liu mak ema estranjeiru mak mai kaer fali hodi dulas fali nasaun Timor-Leste no hanesan Timor oan la konkorda ho Ministru Justisa Manuel Carseres nia deklarasaun hasai esbosu lei kriminaliza difamasaun”. Uar
