PR Lú Olo Vizita Fatin Prosesamentu no Distributór Fini Ikan Nila

Naunil Media (Ermera), Hafoin vizita Grupu Industria Produsaun Kulat Fatuquero, Prezidente Repúblika (PR), Francisco Guterres Lú Olo, akompaña husi Espoza Cidália Nobre Guterres no membru VIII Governu konstitusional hakatliu ba fatin prosesamentu no distributór fini ikan, ne’ebé hahú nia produsaun ikan dezde 2017.

Naunil Media asesu Liu husi pájina espesiál Presidência da República Democrática de Timor-Leste, 18 Novembru 2020.

Iha fatin ne’e, Prezidente Francisco Guterres Lú Olo rona esplikasaun kona-ba lalaok produsaun fini ikan no vizita kolan sira ne’ebé eziste iha sentru ida ne’e.

Responsável Tékniku Peskas Munisípiu Ermera, Markus de Jesus Martins, esplika Sentru Prosesamentu no Distributór Fini Ikan ne’e estabelese iha 2015 no komesa halo produsaun fini ikan iha 2017 ho teknolojia foun, monosex.

“Teknolojia monosex ne’e atu halo ikan ne’e sai aman hotu. Objetivu ita halo ikan ne’e sai aman ho orientasaun ba negósiu. Durasaun fulan 4 ka 5 ita bele halo ona koileta”, informa Markus Martins.

Iha Sentru Produsaun Fini Ikan ne’e eziste kolam haat ho medida 10 x 20 m, maibé kolam ida la funsiona. Kada kolam ida iha hapa (rede) tolu ho ikan-aman 150 no inan 200. Iha semana ida bele rekolla ikan-tolun ho kuantidade rihun 100 ba leten.

Sentru ne’e distribui ona fini ikan ba komunidade, sosiedade sivil no ba liñas ministerial seluk, iha munisípiu 12, menus Covalima no ba Rejiaun Autónoma Espesial Oe-Cusse-Ambeno. Atu hetan fini ikan presiza halo proposta ba Sentru Produsaun Fini Ikan ne’ebé tuir mai sei halo verifikasaun hodi hatene kondisaun ne’ebé proponente sira prepara hanesan fatin, medidas no kuantidade kolan ne’ebé sei uza atu haki’ak ikan.

Liu husi programa Parseiru Públiku ho Privadu (PPP), Sentru Prosesamentu no Distributór Ikan ne’e mós estabelese iha Balibo, Munisipiu Bobonaro no iha Moru, Munisípiu Lautem. “Diferensa sentru iha Gleno ho sentru rua seluk iha Balibo no Moru maka, ho PPP sira bele fa’an ba públiku, enkuantu iha ne’e (Gleno) labele, tanba ida ne’e Governu nian”, esplika Markus Martins.

Difikuldade ne’ebé mak sentru ne’e enfrenta maka laiha mákina atu prosesa hahán ba ikan no falta bomba supa bee hodi fornese ba kolan sira liuliu iha tempu bailoron naruk.

“Difikuldade ne’ebé ami hasoru, ami hato’o ba Na’i Prezidente, tanba iha parte Governu, ami-nia ministériu hato’o proposta ba, dala ruma ko’a tiha. Nune’e ho Prezidente nia vizita ne’e prezidente bele haree”, afirma Markus Martins.

Prezidente Francisco Guterres Lú Olo, liu husi Koordenadór Sentru ne’e husu atu bele estabelesetan fatin prosesamentu no distribuisaun fini ikan iha fatin seluk iha territóriu laran hodi responde ba nesesidade merkadu nasionál no ba dezenvolvimentu ekonomia.

Sentru Prosesamentu no Distributór Fini Ikan Gleno hanesan projetu parseria entre Governu Timor-Leste ho Governu Nova Zelándia, ne’ebé fó fiar ba Organizasaun WorldFish hodi implementa no superviziona hosi Ministériu Agrikultura no Peskas, hanesan na’in ba sentru ida ne’e. */Pau