Xefe Estadu TL Haree Kondisaun Sentru Maternidade no Sala Internamentu Gleno
Naunil Media (Ermera), Prezidente Repúblika (TL), Francisco Guetrres Lú Olo, iha nia vizita ba Sentru Saúde Komunitária Gleno, ohin, haree rasik kondisaun no fasilidade servisu ne’ebé iha sentru maternidade no Internamentu.
Naunil Media asesu Liu husi pájina espesiál Presidência da República Democrática de Timor-Leste, 18 Novembru 2020.
Diretór Sentru Saúde, António de Deus Fátima, ne’ebé akompaña Xefe Estadu vizita fatin rua ne’e esplika, dezafiu ne’ebé sentru ne’e enfrenta maka hanesan ekipa médiku ne’ebé la kompletu, ambulánsia la sufisiente, laiha iha hena naton hodi nahe ba kama sira iha sala internamentu no problema bee-dalan ne’ebé ladi’ak hodi hamosu inundasaun iha tempu udan-boot.
Totál kama ba internamentu iha Sentru Saude ne’e hamutuk 23 ho númeru kama iha sentru maternidade hamutuk 5, pediatra 10 no internamentu ba ema-boot (adultu) 7. Parteira ne’ebé taumatan ba pasiente sira hamutuk na’in 8.
Enkuantu númeru kolaboradór seluk, médiku iha 13, enfermeirus 13, tékniku aleados 11, pesoál limpeza 3 no seguransa na’in 1.
Maioria ema ne’ebé halo konsulta iha Sentru Saúde Komunitária ne’e sofre moras Ispa no hipertensaun ka tensaun aas. */Pau
