SEKomS Expedito : “Kna’ar Vogal Konsellu Administrasaun Importante Lori RTTL Ba Futuru”
Naunil Media (Díli), Tersa (10/10) ne’e Sekretáriu Estadu Komunikasaun Sosiál, 𝗘𝘅𝗽𝗲𝗱𝗶𝘁𝗼 𝗟𝗼𝗿𝗼 𝗗𝗶𝗮𝘀 𝗫𝗶𝗺𝗲𝗻𝗲𝘀 ofisialmente fó posse ba vogal na’in-lima tuir despaixu Nú. 1/SECS/X/2023 no Nú. 2/SECS/X/2023.
Tuir estatutu Rádio Televizaun Timor-Leste, Empreza Públiku (RTTL,EP) nomea vogal na’in-haat mak hanesan, 𝗝𝗮𝗰𝗶𝗻𝘁𝗮 𝗛𝗮𝗻𝗷𝗮𝗻 𝗖𝗼𝗿𝗯𝗮𝗳𝗼, 𝗔𝗻𝗶𝗰𝗲𝘁𝗼 𝗦𝗼𝗮𝗿𝗲𝘀 𝗱𝗼𝘀 𝗥𝗲𝗶𝘀, 𝗠𝗮𝗱𝗮𝗹𝗲𝗻𝗮 𝗱𝗲 𝗝. 𝗣𝗲𝗿𝗲𝗶𝗿𝗮 𝗖𝗮𝗿𝗹𝗼𝘀 no 𝗠𝗮𝗿𝗰𝗲𝗹𝗶𝗻𝗼 𝗫𝗶𝗺𝗲𝗻𝗲𝘀 𝗠𝗮𝗴𝗻𝗼. No vogal na’in-ida nomeia husi traballadór sira iha RTTL, EP maka 𝗝𝗼ã𝗼 𝗚𝘂𝘁𝗲𝗿𝗿𝗲𝘀 𝗱𝗮 𝗦𝗶𝗹𝘃𝗮.
Serimónia tomada de posse hala’o iha Estúdio Rádio Televizaun Timor-Leste, EP, Kaikoli, Dili.
Vogal na’in-lima nia mandatu durante timan haat (2023-2027).
Iha diskursu, Sekretáriu Estadu Komunikasaun Sosiál, 𝗘𝘅𝗽𝗲𝗱𝗶𝘁𝗼 𝗟𝗼𝗿𝗼 𝗗𝗶𝗮𝘀 𝗫𝗶𝗺𝗲𝗻𝗲𝘀 subliña, kna’ar vogal sira nian importante tebes servisu hamutuk hodi lori mídia estatal ne’e ba futuru ne’ebé di’ak liu.
Sekretáriu Estadu husu ba vogal sira atu haree fila-fali kontratu konseisaun ne’ebé halo ho estadu iha tinan 2012. Ho rajaun katak iha artigu balun ne’ebé la tuir ona mudansa teknolojia ohin loron
“Halo fali avaliasaun, katak sei presiza ka la’e RTTL nafatin hanesan empreza públiku. Loloos 2022 halo ona avaliasaun ida ne’e maibé até agora seidauk,” Sekretáriu Estadu hatete.
Tuir Sekretáriu Estadu, liu tiha tinan sanulu-resin, RTTL iha duni avansu maibé mós hasoru dezafiu oioin. Entretantu iha mós oportunidade.
Sekretáriu Estadu subliña, dezenvolvimentu instituisaun ida depende ba buat oin tolu mak hanesan, rekursu umanu, osan no material.
“Ita hotu haree katak depois de transforma RTTL husi atendimentu públiku ba empreza públika, dezafiu boot ida maka espasu, ida fali maka kapasitasaun rekursu umanu ne’ebé atualiza ho situasaun. Tanba ne’e, nono governu fó prioridade boot ba RTTL, EP,” Sekretáriu Estadu salienta. */Kou
