Indonézia Fahe Esperensia ba PNTL Kona-ba “Public Speaking”
Naulin Media (Díli), Tersa (10/10) ne’e Governu Repúblika Indonezia liu husi nia-embaixada iha Timor-Leste hala’o semináriu nasional kona-ba “Public Speaking” ba membru Unidade Trânzitu, Polísia Nasional Timor-Leste (PNTL).
Semináriu refere hala’o iha edifísiu Pusat Budaya Díli ho objetivu atu hasa’e abilidade komunikasaun membru Trânzitu Seguransa Rodoviariu iha atendementu públiku.
Segundu Komandante Jeral, PNTL, Komisáriu Polisia Pedro Belo, hateten semináriu ne’e realiza tanba koperasaun ho Embaixada Republika Indonezia iha Timor-Leste liu husi Adidu Seguransa ho Komandantu Jeral.
“Semináriu ida ne’e inportante tanba akompaña públiku sempre kestiona konaba komunikasaun membru PNTL Trânzitu ho komunidade la tuir ho lolos”, tuir Segundu Komandante PNTL ne’e.
Segundu Komandante PNTL, Komisáriu Pedro Belo, konsidera, semináriu ne’e importante tebes ba membru sira hodi komunika ho komunidade sira, no presija iha kontinuasaun.
Nia informa, semináriu nasional refere hala’o durante loron tolu, hahu iha loron 10, 18 no 20 Outubru ne’e ba membru nain 300.
Iha fatin hanesan, Adidu Seguransa Indonezia (Kedutaan Besar Republik Indonesia-KBRI) Díli, Kombes.Pol. Don Gaspar da Costa, hanesan mos orador hateten KBRI Díli servisu hamutuk ho PNTL no banku MANDIRI realiza seminariu Public Speaking tuir aordu Koperasaun entre Polisi Republika Indonezia no PNTL ne’ebe asina iha tinan 2009.
Nia dehan tan materia ne’ebe maka hato’o iha seminariu ne’e maka hanesan Public Speaking oinsa domina topiku ruma ne’ebe nia koalia, fo kepastian hukum iha nia koalia no atitudi.
Seminariu ne’e partisipa husi membru tranzitu husi munisipiu 13, RAEOA, Atauro no sira ne’ebe destakadu iha Postu Fronteira Mota-Ain, Salele no Sakato, Seminariu ne’e loke husi Segundu komandante Jeral PNTL Pedro Belo, akompaña husi Xefe Departamentu Tranzitu Seguransa Rodoviariu Superintendente Assistente Polisia Luis da Costa, Reprejentante Embaixada Indonezia, Adidu Edukasaun Republika Indonezia iha Dili, Jeneral Manajer Bank Mandiri. Gyor
