PNTL Díli Prende Transaksaun Ilegál Sigarru Hosi Fronteira
Naunil Media (Díli), Tersa (10/10) ne’e, Komandu Munisípiu Díli, liu hosi servisu informasaun Makikit, halo vizilansia hodi prende sigaru illegal no asegura suspeitu joven mane ida ho naran inisial QN, tinan 27 hosi Postu-Administrativu Hauba, Munisipiu Bobonaro.
Sigaru hirak ne’e, hatama ilegál hosi área fronteira Indonézia no Timór-Leste hodi fa’an tutan iha merkadu Taibese.
Durante halo atividade, suspeitu QN uza kareta privadu hodi fa’an sigaru kalan-kalan iha merkadu Taibese no-mos merkadu sira seluk ne’ebe sai ona kliente permanente.
Evidensia ne’ebe polisia prende maka hanesan sigaru ho marka surya 12 hamutuk pakote 159 no sigaru marka Thanoes pakote 402 nune’e total hamutuk 561 pakotes, iha loron segunda kalan mais a menus oras tuku 11:55.
Hafoin asegura ekipa servisu Makikit kontatu kedas ba Esquadra PNTL Nain-Feto, mai lori suspeitu ba Komandu Munisipiu Dili hodi halo detensaun no kontinua prosesa ba Ministeriu publiku tanba PNTL nia dever maka kaptura no halo identifikasaun enkuantu ba kazu krime nia sei prosesa ba tribunal. Ana
