Majór Jenerál Lere : Governu Aloka Rihun U$100 ba Aniversáriu FALINTIL Dala-45

Naunil Media (Díli), Xefe Estadu Maiór Jenerál FALINTIL Forsa Defeza Timor-Leste (F-FDTL), Majór Jenerál Lere Anan Timur, hateten Governu akola rihun U$100 ba komemorasaun aniversáriu Forças Armadas da Libertação Nacionál de Timor-Leste (FALINTIL) ba dala-45 mak sei selebra iha loron 20 fulan Agostu tinan 2020 ne’e.

Xefe Estadu Maiór Jenerál F-FDTL, Majór Jenerál Lere Anan Timur, ba jornalista sira hafoin sorumutuk rutina ho Prezidente Repúblika (PR), Francisco Guterres ‘Lú Olo’, iha Palásiu Prezidensiál Nicolau Lobato, Bairu Pité, Kuarta (29/07).

“Ami foka liu-ba 20 de Agostu ezistensia FALINTIL halo tinan dala-45. Komemorasaun ne’e, komandante sira dehan sei hala’o eventu balun iha 20 Agostu. Hau mos relata eventu balun ba ita nian Prezidente Repúblika, primeiru eventu mak ‘Tour FALINTIL’”, informa Eis-gerileiru Komandate Rejiaun Um Ponta Leste no atual Xefe Estadu Maiór Jenerál F-FDTL, Majór Jenerál Lere Anan Timur.   

Tuir Majór Jenerál Lere Anan Timur, osan rihun U$100 ne’e barak ona tanba ne’e F-FDTL halo tour no inisiativa ne’e mai husi proposta komandate komponente naval.

Jenerál Lere esplika, militar ka ofisiais ne’ebe haleu Timor-Leste, sei sai husi Díli, Kuartel Jenerál no kalan toba iha Bobonaro hodi komemora 20 Agostu hamutuk ho komunidade no ema sira rezistensia nian iha ne’ebá (Bobonaro).

Durante Tour ne’e, Jenerál Lere, hateten sei halo reflesaun kona-ba loron FALINTIL ba komunidade sira.

“Komemorasaun ne’e ita hala’o hamutuk ho ita nian komunidade no ema rezistensia sira no sei halo mos asaun solidariedade ka fó buat ruma tuir ita nian komunidade sira presiza, hanesan fahe fos ka mina rum aba ita nian komunidade”, tenik veteran 24 anos, Lere Anan Timur.

Majór Jenerál Lere, hateten eventu komemorasaun ne’e la’os de’it F-FDTL mak organiza maibe inklui ho Konsellu Veteranu sira, Ministériu Administrasaun Estatal no seluk-tan.

“Hau fila sei kordena ho Ministru Administrasaun Estatal atu haree no organiza fatin sira ne’e”, dehan veteran ne’e.

Ikus-liu, Nia dehan, 20 Agostu nu’udar loron nasionál nian, tanba ne’e tuir lolos FALINTIL no Frente Revolucionário de Timor-Leste Independente (FRETILIN) sempre la’o hamutuk. Pau