La kria Kondisaun, Senadu FCS-UNTL Lamenta, Estudante Lakon Semestre

Naunil Media (Díli,) Senadu husi Fakuldade Siénsia Sosiais (FCS), Universidade Nasionál Timor-Lorosa’e (UNTL), António dos Santos Loco deklara la aplika aula virtual durante Serka sanitária, realidade estudante barak mak sai vitima tenke lakon semestre.

Estudante universitariu hanesan mos senadu ne’e deklara problema hirak ne’e akontese tanba husi parte relevante la kria kondisaun.

“Ha’u nia-haree katak, prosesu serka sanitária konfinamentu obrigatóriu ne’e, fó afeita tebes ba estudante sira nia semestre ida ne’e, tanba sira labele aproveita aula. Ha’u hanoin ida ne’e mós parte ida atu hanorin Universidade, liu-liu dosente sira tau atensaun, atu hanorin estudante sira liu-husi meius global sira hanesan ne’e, hodi aplika ba estudante sira” dehan António ba Jornalista Naunil husi via whatsApp, segunda (29/03).

Nia hatutan tuir nia hare’e durante konfinamentu obrigatoriu serka sanitária , estudante barak maka ladun aproveita didi’ak prosesu sira ne’e, lasignifika estudante la aproveita oportunidade, maibé tanba situasaun mak obriga.

“Iha FCS Departamentu balun hanesan Administrasaun Públika, Políticas Pública, komunikasaun sosial, estudante ho dosente sira balun, buka duni meius hodi tuir aula online ou aula virtual ba Matéria sira ne’ebé mak sira responsável. Maibé iha balun laiha ne’e, nia problema maka estudante barak hela iha kos, depedensia tomak ba inan-aman, no dalan taka, oinsá sira bele hola tan pulsa $ 1 dolar ida hodi tuir aula online” nia lamenta.

Iha biban ne’e nia parte husu ba Universidade, Ministru Ensinu Superior atu bele haree mós asuntu ida ne’e. Oinsá buka dalan hodi bele fasilita estudante sira.
Aleinde ne’e, estudante Anarela Lobato Pacheco husi Departamentu Komunikasaun sosial, akresenta, pandemia covid-19 iha Nasaun Demokrátiku ne’e, sai preukupasaun boot ba estudante sira nia prosesu aprendizagem iha semestre impar.

“Ita-nia Governu sira foti ona medida ba serka sanitária, entaun atividade hotu lalao, inklui atividade eskola paradu. Entaun Serka sanitária impede prosesu aprendizagem la ativa, ida ne’e sai preukupa ba ami estudante, tanba iha Matéria balun ne’ebé maka teoria no iha prátika, ami la konsege tuir” nia deklara

Kona-ba preokupasaun hirak ne’e antes loron hirak liu ba sai diskusaun iha uma fukum Parlamentu Nasional. Maibé to’o ohin loron la iha resposta.

Nune tuir rezolusaun governu nú.15/2021, loron 15 marsu governu disidi blokeia Ka serka sanitaria ba munispiu tolu hanesna Dili Viqueque Baucau To loron rua fulan abril. DMS/ RIT