PR “Lú Olo” Militár Riin Importante Tebes Hamri’ik Nu’udar Pátria

Naunil Media (Díli), Prezidenti Repúblika (PR) Francisco Guterres “Lú Olo”,  Hateten instituisaun militár hanesan riin importante tebes, atu bele hamri’ik nu’udar pátria se Forsa armada la iha uniaun laiha kbiit no la iha prestijiu.

“Instituisaun militár hanesan riin importante tebes ida atu ita bele hamriik nu’udar Pátria, se forsas armadas la iha uniaun, la iha kbiit no la iha prestíjiu, mak Timor-Leste sei la iha uniaun, la iha kbiit no la iha prestíjiu”,  dehan Xefí estadu Francisco Guterres “Lú Olo” liu husi diskursu bainhira komemora Aniversariu Falintil Forsa Defeza Timor-Leste (F-FDTL) ba dala 21, iha Quartel General Fatuhada, Kuarta, (02/02).

PR hatutan,  Falintil Forsas Defeza Timor-Leste (F-FDTL) hanesan instituisaun ida ne’ebé iha hela evolusaun nia laran no la’o tuir nia dalan tuir limitasaun sira-ne’ebé mosu hosi kontestu nasionál.

Xefe estadu hateten,  Dezafiu ne’ebé iha nia oin hanesan ezersísiu kompleksu ida ba jestaun nesesidades, intereses no ojetivus, ne’ebé bele rezolve de’it liu husi prosesu planeamentu ida ne’ebé rigorozu no ezijente kona-ba defeza nasionál no forsas, prosesu hirak ne’e estabelese ona iha lei, liuliu iha estratéjia militár nia dokumentu estruturante sira, ne’ebé mak foin lailais aprova.

Aman ba nasaun ne’e esplika,  Loos duni katak presiza hadi’a nafatin kuadru legál no regulamentár ba dezenvolvimentu no reforsu hosi instituisaun militár, hodi halo nia sai presizu no efetivu liután, atu nune’e bele hetan konsensu ida ne’ebé luan hosi ajente polítiku no órgaun soberania tomak.

Nia dehan,  Klaru katak presiza harii Sistema Forsas nia kapasidade sira, tanba ne’e mak luta naba-naba atu halo forsa sira sai ekipadu di’ak liután, maibé ema sira ne’ebé hatene istória hatene mós katak ema rasik no sira nia vontade atu luta mak halo diferensa, no sei kontinua nafatin hanesan ne’e, instituisaun militár ne’e ba futuru, tenke kompostu hosi ema militár ke iha kompeténsia no motivasaun, ne’ebé tuir padraun aas liu ba formasaun, kualifikasaun no treinu. *Jos