SEKOOP Agradese UNDIL Oferese Estudante Estajiáriu Iha Kooperativa NSH
Naunil Media (Likisá), Diretór Nasionál Setór Kooperativa husi Sekretariu Estadu Kooperativa (DNSK-SEKOOP), Arnaldo Borges, husu agradese ba Universidade Dili (UNDIL) ne’ebé oferese ninian estudante husi Fakuldade Enjenaria, Departamentu Tekniku Indútria (DTI) estajiáriu sira estajiu iha Kooperativa Multi-Sektoral Nurak Sulin Hamutuk (NSH).
DNSK-SEKOOP Arnaldo Borges ba Naunil Media hafoin partisipa iha serimónia despedida estajiariu husi estudante Departamentu Tekniku Indústria, iha Kooperativa Multi-Sektoral Nurak Sulin Hamutuk (MSH), iha Aldeia Raime, Suku Vatuvou, Postu Administrativu Maubara, Munisípiu Likisá, sexta (12/01).
DNSK-SEKOOP Arnaldo hateten, SEKOOP husi diresaun tekniku rua atu hato’o apoiu ba iha kooperativa sira hotu ne’ebé estabelese iha Timor-Leste, hetan konvite hodi partisipa iha serimónia despedida ho estudante sira husi UNDIL ne’ebé hala’o estajiu iha kooperativa ne’e.
“Ha’u sente orguillu tebes tanba bele konsidera SEKOOP atu mai haree lala’ok produsaun tasi been sai bee moos ne’e prosesamentu oinsa. Ha’u mós husu agradese ba UNDIL rasik bele fó fiar ba kooperativa ne’e hodi haruka ninia estudante sira mai hala’o estajiu iha Kooperativa Nurak Sulin Hamutuk”, dehan Arnaldo.
Diretór ne’e hatutan, prosesu estajiu ne’e atu hetan esperensia foun ruma husi kooperativa tanba teoria ne’ebé aprende iha banku universidade ho prátika ne’e la hanesan, tanba ne’e mak estudante sira aprende depois ba futuru sira atu bele halo prátika rasik.
Iha fatin hanesan Xefe Departamentu Tekniku Indústria (DTI) Francisco Sarmento haktuir, iha universidade aprende teoria no pratika hanesan estudante sira mai estajiu iha kooperativa ne’e sira ne’ebé mak remata ona sira nian teoria iha universidade.
“Iha universidade ami iha teoria no prátika hanesan estudante sira ne’ebé hetan prátika ne’e atu remata ona sira-nia teoria. Entaun sira tenki sai ona ba terenu kona-ba pratika profesionál”, Francisco akresenta.
Xefe departamentu ne’e, sente kontenti tanba prosesamentu tasi been sai fali bee moos ne’e la’ós husi nasaun seluk mak hari, maibé ne’e inisiativa husi timoroan rasik kria espera ba fututu nafatin kolabora ho UNDIL.
Iha sikun ne’e Fundadór Kooperativa Multi-Sektoral Nurak Sulin hamutuk (MSH) Luciano dos Santos Pereira haktuir, senti orgullu ba UNDIL bele hili Kooperativa Murak Sulin Hamutuk hodi mai hala’o prátika estajíu durante fulan ida iha ne’e.
“Iha ne’e ami sempre iha konsiderasaun tanba kooperativa ida ne’e, atu la’o nafatin presija hetan motivasaun no fó korajen nafatin ba ami. Ami sei nakloke ba joventude timoroan sira oinsa atu dezenvolve aan, kooperativa la taka dalan ba kualker situasaun ne’ebé hakarak inisiativa aprende hamutuk”, Luciano hato’o.
“Ami kompleta malu oinsa ho sistema produsaun ne’e ami koñesimentu iha parte balu, hanesan jestaun ami koñesimentu ne’ebé ho minimu ami bele kompleta malu”, Fundadór Kooperativa ne’e realsa.
Tuir nia, estudante sira aprende teoria ne’ebé mak sira aprende iha universidade, maibé aprende teoria de’it pratika la iha, agora sira mai iha kooperativa sira aprende prosesu prosesamentu tasi been sai bee moos estudante sira mai iha kooperativa hetan koñesimentu foun tanba sistema ida ne’e foun iha Timor-Leste.
Iha oportunidade ne’e estudante estajiáriu Constantino Da Cruz Gaio hato’o, durante fulan ida iha kooperativa ne’e hodi aprende kona-ba prosesamentu tasi been sai bee moos.
“Prosesu ne’ebé ami aprende tasi been dada husi sanyo, depois mai tabun iha Profil, hotu halo filtrasaun ba bee moos hodi tau iha galun, mak distribui ba merkadu. Maske ho tempu ne’ebé limitadu ba ami hodi aprende, maibé ami hatene naton hodi prenxe kriteriu iha universidade”. Tenik Costantino.
Entretantu estudante departamentu indústria ne’ebé hala’o estajiu iha Kooperativa Murak Sulin Hamutuk, hamutuk nain haat kompostu husi feto nain rua no mane nain rua hahú estajiu estajiu iha fulan janeiru remata iha fevereiru 2021. Jon/Emj8