Lere Apresia Estadu TL Sei Fó Konfiansa Lidera F-FDTL
Naunil Media (Díli), Xefe Estadu Maiór Jenerál F-FDTL Tenente Jenerál Lere Anan Timor apresia ba governu no estadu Timor-Leste ne’ebé sei nafatin fó konfiansa hodi lidera instituisaun Falintil Forsa Defeza Timor-Leste (F-FDTL).
Xefe Estadu Maiór Jenerál F-FDTL Tenente Jenerál Lere Anan Timor ba jornalista sira iha serimónia promosaun diviza, iha Palásiu Prezidenti Nicolau Lobato, Bairru Pité, sexta foin lalais (26/02).
“Ha’u-nia apresiasaun dala ida tan, governu no estadu fó konfiansa ba ami na’in hira diviza ne’ebé tula ami la’ós atu halo ami kontente. Atu foti an katak ami mak di’ak liu, bo’ot liu iha Timor, maibé ne’e hanesan responsabelidade. Atu assume papel ka misaun importante ida ne’e no misaun ida ne’ebé lulik tanba husi jerasaun liu husi situasaun ida ne’ebé difisil”, dehan Tenente Jenerál Lere.
Tenente Jenerál Lere hatutan, ema barak fakar ran no soe nia isin instituisaun ida ne’e fó nia kontinuidade ba sira-nia obra asegura soberania no independénsia nasionál Timor-Leste nian, posto ne’ebé mak fó hanesan knar hodi hadiak an.
“Ami simu knar ne’ebe fó mai ami sai hanesan refleksaun bo’ot ida ba ami ida-idak, atu halo di’ak liután, buka kuriji ami-nia an hodi servi di’ak liután ba ita povu no rai lulik Timor-Leste”, Lere subliña.
“Nu’udar jerasaun husi ai-Laran nian ami iha responsavel ne’ebé mak bo’ot halo oinsa instituisaun F-FDTL sai pilar ida importante ba seguransa estabilidade nasionál. Oinsa ita-nia nasaun ne’e metin kualker parte iha mundu Polítiku ka grupu sempre aproveita ema militár instabiliza ou atu alkansa nia onjetivu grupu nian no individual nian”. tenik nia
Ikus nia dehan,”ida ne’e maka ami-nia dever no obrigasaun atu halo oinsa ba jerasaun foun sira bele hatene hadomi nia rain, povu mai husi partriotismu no nasionalismu ne’e importante liu”. Flo.