Prinsipiu Eskola Novel da Paz Lakohi Sadere Ba Governu
Nunil Media (Díli), Diretór Eskola Nobel da Paz, Pedro Nunes Menezes, hateten lakohi sadere án ba governu, maske kondisaun edifisiu eskola refere kuize didin deit ho kalén, tanba dezde inisiu harii hanesan eskola privadu.
“Eskola ne’e harii hanesan eskola privadu ho ninia prinsipiu ne’ebé iha lakohi sadere ba governu. Hau iha kbi’it nafatin hodi koopera hamutuk ho estadu no governu hodi forma jerasaun foun ida ne’e ba futuru nasaun Timor-Leste nian”, hateten Diretór Eskola, Pedro Nunes Menezes, iha knaar fatin Kintal Bo’ot, Dili, Kinta (30/01/2020).
Diretór nu’udar mos fundador ba eskola ne’e haktuir, antes ne’e Ministeriu Edukasaun Juventude no Desportu promete ona katak ba tinan ida ne’e atu halo rehablitasaun ba eskola sira teritóriu timor laran, maibe seidauk realiza tanba orsamentu jerál estadu faze jeneralidade lapasa iha parlamentu nasionál.
“Planu ministeriu edukasun nian atu halo rehabilitasaun no konstrusaun permanente ba edifisiu atus ida resin ba kada eskola iha Timor-Leste maibe seidauk bele atinji tanba orsamentu la passa iha parlamentu nasionál”, fundamenta director eskola Novel da Paz, Pedro.
Total estudante iha eskola Novel da Paz husi sétimo ano to’o nonu ano hamutuk 2.343, sala de aula hamutuk 18, fahe ba aula rua iha dader no meiudia. Professores hamutuk 67, permanente nain 3, kontratadu husi governu 27, kontratadu husi fundsaun hamutuk 40. Jml
