Joventude Makadiki : Ami La’os Ona Mutu Rabu

Fahe Tutan

Naunil Media (Viqueque), Xefe Joventude Makadiki Miguel Soares, hateten, dala barak sempre mosu iha ema balun nia hanoin suku Makadiki postu administrativu Uatulari, Munisipiu Vikeke nudar suku muturabu tanba haree hosi karakteristiká juventude sira ne’ebé sempre ho mentalidade ne’ebé to’os (watak keras) tanba hakarak klarifika katak joven suku Makadiki rasik agora dadaun kria kooperasaun, ho juvrntude suku seluk nune’e kria instabilidade hodi kontribui ba dezemvolvimentu.

“Ami joventude suku Makadiki la’os ona mutu rabu ne’ebé hanesan tempu uluk, ema sempre bolu ami joven mutu rabu maibé agora ha’u bele dehan lia fuan sira ne’e diferente tebes, tanba agora ami koopera malu oinsá atu bele kontribui paz no estabilidade hodi dezenvolvimentu ita rain”,dehan nia ba jornalista Naunil Media Tersa foin lalais ne’e.

Tanba jovetude Makadiki agora dadaun buka hakribi violensia liu hosi koopera malu ho joven sira seluk hodi kontribui ba paz no estabilidade. No buka kapasita an ba kualker atividade ne’ebé iha suku laran.

Tuir Miguel katak, atividade ne’ebé maka joven Makadiki hahú tuir maka iha aréa lian inglés ne’ebé parte SEFOPE kria.

“Kolega joven balun komesa hakbesik an ona bá sentru formasaun sira ne’ebé SEFOPE kria ona no ami agora hakribi violensia buka koopera ho joven sira hosi suku seluk nune’e kria relasaun bá halo atividade postivu hanesan aproveita tempu ba kapasita an ida ne’e maka agora ami halo”,

“Agora ne’e la’os ona uluk ema sempre joven muturabu ami agora oinsá atu buka kapasita an hodi konkore ba merkadu traballu ida ne’e maka ami presiza”,dehan Miguel.

Tanba papél joven lolos maka atu oinsá aprende, koopera no hatudu kreatividade hodi bele kontribui ba dezenvolvimentu nasionál.

Miguel espera katak, tinan 2020 tinan ne’ebé tranformativu liu tan hodi lori joven Makadiki bele partipasipa oportunidade sira hodi kapasita joven Makadiki rasik kontribui ba prosesu dezemvolvimentu ne’ebé maka la’o dadaun.

“Ha’u nia esperansa katak, iha tinan 2020 joven suku Makadiki bele maximiza liu tan partisipasaun bele kapasita-an ba dezenvolvimentu Timor-Leste”,katak Miguel.

Tanba juventude maka esperansa nasaun nian no aliserse fundamental nasaun nian.

Nia dezafia bá joven makadiki atu evita nia an hosi konflitu sira, kontribui paz, estabilidade, aproveita tempu hodi hariku koñesementu nune’e.

“Ha’u nia mensagem ba juventude sira hotu katak, joventude hotu-hotu tenke evita imi nia an husi problema sira ne’ebé maka iha, atu nune’e bele fó kontibui paz ba iha dezemvolvimentu Nasionál”, nia dezafia.

iha sorin seluk xefe suku Makadiki, Afonso dos Reis, realsa, joventude Makadiki rasik agora dadaun halo kooperasaun ho joven sira suku seluk kria estabilidade no kasita an.

“Ha’u sai hanesan lideransa ida, ha’u haree katak joven suku Makadiki iha mudansa bo’ot tanba sira komesa muda mentalidade sira uluk no prefere kapasidade aan no hakribi violensia iha suku laran”, dehan nia.

Nia louva tebes ho mentalidade ne’ebé joventude suku Makadiki dadaun ne’e

“Ha’u louva no agradese tebes ba joventude sira hosi suku Makadiki bele konsege muda ona sira nian mentalidade“, katak Afonso. Rit

Leave a Reply

Your email address will not be published.