Prontu Infrenta Dezafius, PLP Lakohi Ho CNRT

Fahe Tutan

Naunil Media (Díli), Vice Konsellu Politika Nasionál (KPN) Partidu Libertasaun Popular (PLP), Francisco Vasconselos, hateten PLP prontu hasoru kualker dezafius iha situasaun politika atual no lakohi ona atu hamutuk tan ho partidu CNRT (Congresso Nacionál Para a Reconstrução de Timor-Leste) iha formasaun governu foun.

“Konfiasa mak ita tenke iha koligasaun foun ida, maibe ho CNRT lae ona. Ami hamutuk iha koligasaun depois sira soe tiha ona ami, tanba vota kontra tiha orsamentu jeral estado 2020 iha parlamentu nasionál. Dala ida atan, ho CNRT lae ona !. Ami la iha ona intensaun ba partidu CNRT, PLP nu’udar partidu politiku tenke prontu hasoru kualker konfigurasan iha situasaun politika atual”, hateten Vice Konsellu Politika Nasionál (KPN) Partidu Libertasaun Popular (PLP), Francisco Vasconselos, ba jornalista hafoin reuniaun ho líder nasional Partidu Demokrátika iha sede PD Kolmera, Kuarta (19/02/2020).

Vise Konsellu Politika Nasional PLP ne’e hateten liu tan, “Ajenda ho CNRT, lae ! tanba hori bainhira ami hamutuk iha koligasaun depois sira soe tiha hela ami, sira vota kontra tiha OJE ne’ebe ho CNRT lae”.

Sekretáriu Jeral PD, António da Conceição ‘Kalohan’, hateten PD nafatin loke án hodi halo komunikasaun ho partidu politiku sira ne’ebe iha asentu parlamentu nasionál atu bele fó solusaun ruma ba situasaun polítika atual.

“Atu fo fila fali mudansa de pensamento e hanoin ba ita nia povo,hodi haree katak nasaun ne’e se moris hakmatek.tanba partidu politiku sira ne’ebe kontexta ba ukun, sira hamutuk hela, ida ne’e mak ami tenta atu halo” dehan Kalohan.

Komunikasaun entre partidu politiku sira ne’ebé iha asentu parlamentu nasionál, ne’e bazeia ba proposta Prezidente Repúblika Francisco Guteres ‘Lú Olo’ núdar meius ida oinsa atu bele buka konvense malu fó solusaun ba situasaun atual politika rai laran. Ana

Leave a Reply

Your email address will not be published.