DNCRC Fasilita Formasaun Jestaun Website ba Jestór Sira Radio Komunidade
Naunil Media (Díli), Segunda (24/08) ne’e, Sekretaria Estadu Komunikasaun Sosiál (SEKOMS) liu husi Diresaun Nasionál Sentru Radiu Komunidade (DNCRC-Sigla Português) realiza programa formasaun kona-ba jestaun website ba jestór sira husi Radio Komunidade Munisípiu 12 inklui Rejiaun Administrativa Espesiál Oe-Cusse Ambeno (RAEOA).
Programa formasaun ne’e hala’o iha Salaun Autoridade Nasionál Komunikasaun (ANC-Sigla Português).
Diretór DNCRC, Abel da Conceição, informa programa formasaun ne’e espesifika ba jestór sira husi radio kominudade sira, liu-liu kona-ba tékniku no utilizasaun website.
“Formasaun ba sira parte tékniku no jestór sira oinsa atu uza Website iha radio kominudade sira, tamba iha fulan kotuk ita halo instalasaun ba radio komunidade sira hotu”, dehan Diretór DNCRC, Abel da Conceicão, ba jornalista sira, hafoin partisipa abertura programa formasaun ne’e.
Diretór DNCRC, Abel da Conceicão, hein katak ho formasaun refere bele hasa’e kuiñesementu jerente sira nian kona-ba radio streaming no website.
“Fulan kotuk (Jullu), ami halo ona instalasaun radio streaming no website ba radio kominudade hamutuk 16 husi munisípiu 12 inklui RAEOA”, informa Diretór DNCRC, Abel da Conceicão.
Partisipante Natalino Fernandes Ximenes, kontente no agradese ba SEKOMS liu husi DNCRC, tanba ho programa ne’e bele hasa’e tan kuiñesementu liu-liu jestaun website radio nian.
“Agradese tebes ba SEKOMS liu husi DNCRC ho nia tekniku”, tenik partisipante ne’e. Ivo
