AgrikulturaGeralNews

Agrikultór Natar Sorukail Presija Urjente Tratór no Irigasaun

Fahe Tutan

Naunil Media (Baguia), Agrikultór sira husi Aldeia Baboru no Aldeia Baiafa, Suku Wakala, Postu Administrativu Baguia, Munisipiu Baucau presija urjentemente Ministériu Agrikultura no Peska (MAP) ninia apoiu tratór no hadi’ak irigasaun ba natar Sorukail.

Xefe Aldeia Baboru, Adão da Costa, hateten dezde Timor restaura ninia independensia, argrikultór sira kuaze 20 ne’ebe halo natar iha Sorukail nunka hetan apoiu tratór no irigasaun husi Ministériu Agrikultura no Peska.

“Ami iha ne’e la iha irigasaun, tanba ne’e husu ba governu liu husi ministériu ne’ebe tutela bele fó atensaun ba ami nian natar”, dehan Xefe Aldeia Baboru, Adão da Costa, iha nia hela fatin Baboru, Baguia, Kuarta (19/02/2020).

Líder autoridade aldeia ne’e informa, preokupasaun refere hato’o bebeik ona ba xefe suku, administradór postu no prezidente autoridade munisipiu, maibe to’o agora laiha resposta.

“Kona-ba irigasaun nian ne’e ami halo enkontru dala barak ona iha suku, hau mos husu ona admnistrador postu Baguia nian, hato’o ona mos ba Prezidente Autoridade Munisipiu Baucau, maibe to’o agora laiha resposta ruma, tanba ne’e núdar líder autoridade aldeia nian sente triste tebes”, informa xefe aldeia ne’e.

Natar Sorukail ninia luan kuaze 150 hektares ho total agrikultór sira kuaze 20 mai husi aldeia Boboru no Baiafa mak halo natar iha ne’eba (Sorukail). Dvo

Leave a Reply

Your email address will not be published. Required fields are marked *