Iliomar Presija Urjente Ambulansia Foun
Naunil Media (Iliomar), Xefe Sentru Saúde Postu Admnistrativu Iliomar, Narsizio Camões ‘Nardy’, hateten presija urjentemente ambulansia foun hodi transfere pasiente sira ba Vila Lospalos, tanba ambulansia ne’ebé durante ne’e utiliza kondisaun ladi’ak ona.
Narsizio Camões ‘Nardy’ hato’o nia preokupasaun ba Naunil Media iha nia kna’ar fatin Sentru Saude Vila Iliomar, Kinta (20/02/2020).
Xefe Sentru Saúde Iliomar ne’e haktuir, “Ekipa nasioál direitamente ba haree ona kondisaun ambulansia ne’e, e sira (ekipa nasionál) dehan kareta ne’e nia kondisaun ladi’ak ona, entaun labele uza no tenke para de’it iha fatin. Maske nune’e ekipa nasionál mos la hateten ba ami atu entrega kareta foun ruma”.
Nardy dehan, maske ho preokupasaun hirak ne’e la hamate pesoal saúde sira nian vontade hodi kontinua servisu fó atendementu ba pasiente sira, tanba halo kolaborasaun ho autoridade lokál hotu iha Iliomar.
“Ami kolaborasaun di’ak tebes parte seguransa equarda PNTL, admnistradór no Igreja, kuandu iha ema ruma moras, ami bolu sira (PNTL, administradór no Igreja) ba lori mai iha sentru saúde nue’e halo atendementu. Kuandu atu halo transferensia, ami bolu ambulancia husi Lospalos mai tula pasiente”, informa Nardy.
Nardy dehan, “Ami labele obriga kontinua utiliza kareta ne’e tanba kondisaun ladi’ak ona fó ameasa ba ema nian vida. Tempu udan motorista mos bokon hotu tanba kareta fruzu ona”.
Enkuantu Kona-ba aimoruk no nesesidade seluk, xefe sentru saúde ne’e dehan sufsienti hela, perkupasaun mak só ambulansia.
Sentru refere iha pesoal saúde kuaze 20, kompostu husi médiku jerál, enfermeiru, parteira no farmasia.
Postu Administrativu Iliomar iha suku 6 mak hanesan, suku Iliomar 1, Iliomar 2, Aelebere, Caenliu, Fuat no Tirilolo ho ninia aldeia 25.
Postu Administrativu Iliomar iha nian luan 302,17 kilómetru (kuadradu) no iha populasaun 10.976 no total uma kain 2.132. Dvo
