PN Budu Projetu Lei Anti Korupsaun, Prosesu Kazu Korupsaun Kontinua La’o

Fahe Tutan

Naunil Media (Díli), Komisaun ‘A’ ne’ebe Trata Asuntu Justisa no Konstitusional iha Parlamentu Nasionál (PN) kontinua budu hela projetu lei anti korupsaun tanba to’o agora seidauk iha aprovasaun final ruma, maibe prosesu ba kazu korupasaun sira iha rai laran kontinua la’o.

Asuntu ne’e deklara husi prezidente komisaun ‘A’ Deputada Carmelita Caetano Moniz, ba jornalista sira iha resintu Parlamentu Nasionál, Kinta (27/02).

Deklarasaun deputada husi bankada CNRT nian ne’e hodi fó resposta ba xefe estadu Timor-Leste Francisco Guterres ‘Lú Olo’ foin lalais.

Deputada Carmelita Caetano Moniz, rekuiñese lei anti korupasaun seidauk iha aprovasaun maibe investigasaun no prosesu ba kazu korupsaun sira iha rai laran kontinua la’o.

“Sim; Lei Anti Korupsaun ne’e ami seida’uk aprova maibe prosesu ba kazu korupsaun sira iha rai laran ne’e kontinua la’o, tanba ita iha lei kódigu penál ne’ebe koalia kona-bá korupsaun. Ita iha lei brankeamentu kapitál ne’ebe koalia kona-bá terorizmu no fase osan, ita iha lei kona-bá trafiku umanu no mos ita lei kona-bá droga. Dala ruma ita hanoin ita laiha lei anti korupsaun, maibe ne’e lae, ita iha lei no ami esforsu para atu halo kompleta de’it”, hateten prezidente komisaun ‘A’ Deputada Carmelita Moniz.

Carmelita mos rekuiñese, durante ne’e sosiedade sira kontinua kestiona, iha ne’e diskusaun ba lei anti korupsaun paradu ‘Budu’.

“Iha medida rua, medida prevensaun no atu kriminaliza kona-bá konstrusaun sira ne’ebé laiha kualidade eh konstrusaun sira ne’ebé ema abandona. Ami hanoin katak ne’e importante e tenke ajusta mos iha ne’ebá”, relasa Nia.

Deputada ne’e dehan, komisaun ‘A’ sei konvida tan entidade hotu atu hamutuk halo diskusaun kle’an liu tan, katak foti sai husi Kódigu Penál mai hotu lei anti korupsaun.

“Lei sira ne’e ita iha hotu ona, entaun agora ami agrupa lei anti korupsaun ka ami mantein, ne’ebe prosesu ne’e la’os fasil tanba ne’e tenke halo análiza ho didi’ak” dehan Nia.

Projetu lei anti korupsaun (LAK) antes ne’e konaba kapitulu jerál deit to’o ona artigu 22, nune’e to’o agora seidak bele serteza bainhira mak lori ba plenária. Ana

Leave a Reply

Your email address will not be published.