Istória TL Úniku no Forte, Labele Kompara Ho Australia
Naunil Media (Díli), Xefe Delegasaun Veteranus Autralia, Michel Stone, hateten istória Timor-Leste (TL) úniku, kapás no forte tebes iha mundu tomak no sei lakompara ho istória Australia nian.
Michel Stone deklara asuntu ne’e liu husi nia intervensaun iha semináriu nasionál hodi komemora ba loron veteranu/a sira nian mak hala’o iha Centro de Convenções de Díli (CCD), Tersa (03/03).
“Timor-Leste úniku, kapás no forti tebes iha mundu tomak no hau labele kompara ho hau nia rain tanba historia lahanesan. Ita nia istória ne’e hanesan ai abut ida no ai hun bo’ot bainhira anin no udan bot mai mós forsa nafatin ita labele nega”, hateten Xefe Delegasaun Veteranus Autralia ne’e.
Eis Militar Australianu ne’e lori naran veteran husi Australia tomak agradese no ondra bo’ot ba tanba bele partisipa loron espesiál ba veteranus Timor-Leste nian.
“Ami hanesan vijinu di’ak no ami mai hanesan camarada no hanesan estudante ami hakraik an no valores bo’ot ba loron veteranus, ba ita bo’ot sira no ita nia maluk sira ne’ebé terus la konsege mai iha ne’e, ema hotu kontribui ba tempu rezistensia atu bele hamutuk iha fatin ne’e”, dehan Nia. Leo
