PR Lú Olo : “03 Marsu Loron Espesiál ba Veteranu Sira no Povu Timor Laran Tomak”

Fahe Tutan

Naunil Media (Dili), Prezidente Repúblika, Francisco  Guterres ‘Lú Olo’, hateten  03 fulan Marsu hanesan selebrasaun loron espesiál ba  veteranu sira no ba povu Timor laran tomak liu husi lei númeru 3/2016.

Xefe Estadu Timor-Leste, Lú Olo hateten asuntu ne’e liu husi nia diskursu ambitu selebrasaun loron nasionál veteranus iha Praça da Proclamação Palasiu Governu, Tersa (03/03).  

“Ohin ita selebra data istoriku 3 Marsu 1981, ne’ebe konsagra ona husi Estadu Timor-Leste liu husi lei nú 3/2016 núdar loron veteranu sira nian. Ba veteranu sira no kombatentes libertasaun nasionál sira hotu, husi Frente Armada, Frente klandestina, Frente Diplomata no povu Timor Laran tomak ne’ebé luta hahu husi 1974 to’o mai hakotu funu 1999, to’o restaura ita nia independensia iha 20 Maiu 2002”, diskursu Xefe Estadu Timor-Leste, Francisco Guterres ‘Lú Olo’ ambitu selebrasaun loron veteranus.

Komandante Supremu esplika, “Data istóriku ne’e liga ba Komferensia nasionál  Fretilin nian ne’ebé hala’o iha Muabai Viquque iha loron 3 fulan Marsu ho orientasaun husi membru Comite Central  Fretilin, sobrevivente nain rua, Xanana Gusmão, Ma’huno Bulerek Karathayano ho komfresista sira hili Comite Central Fretilin nian nain 9 hodi reorganiza fali hodi luta ba ita nia  libertasaun nasionál iha teritóriu Timor laran”.

Aman Nasaun no Simbolu Unidade Nasionál ne’e fundamenta liu tan katak, objetivu husi selebrasaun ne’e hodi reativa hikas memoria pasadu  no transmite ba jerasaun foun sira kona-bá luta Timor nian husi 1975 to’o mai iha 1999.

Partisipa iha eventu refere Sekretáriu Jerál Partidu Fretilin, Marí Alkatiri, Xefe Estadu Maiór Jenerál F-FDTL, Maijór Jenerál Lere Anan Timur, Prezidente Parlamentu Nasionál, Arão Noe, Primeiru Ministru, Taur Matan Ruak, Prezidente Tribunal Rekursu, Deolindo do Santos, Eix Prezidente Repúblika, José Ramos Horta, Inklui membru oitavu governu konstitusionál no vetranu/a husi Munisipiu sanulu Resin rua inklui RAEOA-ZEESM.

Selebrasaun loron veteranus nian ne’e kada tinan realiza dala ida, iha tinan ne’e realiza hamutuk ba dala 3. Dms

Leave a Reply

Your email address will not be published.