MOP Abel Pires Fó Prioridade Rekoperasaun Kalamidade
Naunil Media (Díli), Ministru Obras Públika (MOP) Abel Pires da Silva hateten, Durante mandatu sei fó prioridade ba rekoperasaun kalamidade, no oinsá halo prevensaun tanba tinan-tinan estadu halo enerjia barak ba rekoperasaun.
Membru VIII governu Konstitusionál hato’o lia hirak ne’e ba jornalista sira hafoin simu posse husi Prezidente Repúblika (PR) Francisco Guterres “Lú Olo” iha Palásiu Prezidensiál Nicolau Lobato Bairru Pite, tersa (22/03).
“Prioridade lubuk ida maibé sira Prioridade ida mak rekoperasaun husi kalamidade, maibé ida importante liu tan mak oinsá atu halo prevensaun tanba se lae ita tinan-tinan ita sei halo enerjia barak para atu halo rekoperasaun tanba ne’e mak ita presiza halo prevensaun no depois mak haree projetu sira ne’ebé estratéjiku iha ita nia rain”, dehan MOP Abel.
Abel hatutan, Nudar Ministru Obras Públika prioridade ida tan mak oinsá aselera esforsu tomak iha ministeriu laran nune’e bele serbí di’ak liu tan povu no rai ida ne’e.
“Ha’u nia prioridade mak oinsá atu aselera esforsu tomak iha ministeriu nia laran para atu serbí di’ak liu tan ita nia povu no ita nia rai, oinsá mak aselera servicu hotu iha ministeriu laran para bele serbí di’ak liu tan ita nia povu”, katak Abel.
Iha fatin hanesan Prezidente Repúblika Francisco Guterres Lú Olo mós saúda membru governu foun no mós ba membrus empossadus Governu, iha serimónia solene ida ne’e, serimónia ne’e marka loron entrega misaun nobre ida ba kompatriota na’in 4 atu serve inkondisionalmente ba Povu no Pátria nu’udar membrus Governu Konstitusionál.
Lú Olo hateten, Iha vida no funsionamentu kualker Governu ida nian, proposta husi Primeiru-Ministru atu substitui membrus Governu, hanesan hahalok normal ida, Substituisaun ida ne’e halo ba nesesidade pontuál sira ne’ebé define husi Primeiru-Ministru, no Governu Konstitusionál ida ne’e atu hasae efikásia asaun Ezekutivu nian to’o ninia mandatu ramata, no hein katak halo ida ne’e konsege halao polítikas no programas hatuur ona ba área Justisa, Obras Públikas, Finansas no Asuntus Kombatentes Libertasaun.*Jos
