Númeru Kazu Violensia Domestika Kontinua As Iha TL
Naunil Media (Díli), Parlamentu Nasional (PN) liu husi komisaun ‘F’ trata asuntu Saúde, seguransa social no igualidade jeneru, identifika kazu violensia domestika hasoru feto no labarik feto sira iha Timor-Leste iha tinan 2021 hamutuk 20.000 resin.
Prezidente Komissaun ‘F’, Deputau Noe da Silva Ximenes, informa fiskalizasaun Parlamentu Nasional iha komisaun ‘F’ nota katak, violensia ne’e as iha tinan 2021 hamutuk 20.000 resin mak akontese.
“Tuir ami nia fiskalizasaun kazu hasoru feto no labarik feto sira maioria violensia seksual, mak akontese no grave liu mak insestu hanesan maun ka aman viola rasik sira nia oan no sira nia feton. Iha tinan 2021 ami identifika ona katak feto no labarik feto kuaze 20.000 resin mak hasoru violensia”, dehan nia iha salaun Katedral, Kuarta (23/03).
Relasiona ho ida ne’e, PN husu parte hotu-hotu atu oinsa buka maneira hapara violensia hasoru feto no labarik feto iha Timor-Leste.
“Parlamentu Nasional sei halo investigasaun atu hatene klean liu tan hodi hatene motivu lolos kazu iha Timor-Leste”, tenik nia
Iha fatin hanesan, Reprezentante Konselu Diretoria Rede Feto Maria Domingas Fonseca Alves, esplika, forum nasional núdat atividade projeitu spot light rede feto no apoia husi Uniaun Europeia.
“Hanesan ohin ita haree katak Uniaun Europeia tuir nia istoria lolos aloka Orsamentu $500.000 milloens bá mundu tomak, maibé Uniaun Europeia aloka mai iha timor kuaze $15.000 milloens”, dehan nia
Husi Orsamentu $15.000 milloens ne’e hodi fasilita ona aktividade lubuk Ida, tanbá ne’e rede feto mos hetan programa Ida ne’e hodi focus bá iha munisipiu tolu hanesan Bobonaru, Ermera no Dili. LTS
