Relay Laleia FC Sei Joga Amizade Ho PSK Kupang no Bintang Timur

Fahe Tutan

Naunil Media (Dili), Prezidente Klube Futebol Relay Laleia FC, Feliciano Perpetua Ximenes, hateten sei  joga amizade hasoru klube husi nasaun viziñu Indonézia Klubu PSK Kupang no Bintang Timur iha fulan Abril 2020.

“Agora dadauk ne’e ami hetan ona oportunidade husi Prezidente Federasaun Futeból Timor-Leste (FFTL), ekipa Relay Laleia FC sub 16 ba hala’o jogu amizade ho klube rua (PSK Kupang ho Bintang Timur) iha Indonezia. Ida ne’e hanesan preparasaun mos ba kualifikasaun liga Juvinil Timor-Leste nian ne’ebe akontese iha fulan Maiu”, informa Feliciano Perpetua Ximenes via telephone ba Naunil Media, Tersa (03/03)

Prezidente Klube Relay Laleia FC ho idade foinsa’e ne’e deklara, “Ami iha ona ligasaun husi PSK Kupang idade 16 no mos idade 16 Bintang Timur Atambua iha ona data fiksu atu halo tryout iha fula 23 Abril tryout ho PSK Kupang no  26 Abril ami sei halo tryout ho Bintang Timur Atambua”. Tenik nia.

Prezidente klube ne’e dehan, sira preparadu atu hasoru joga amizade ne’ebe sei mai no optimista sei ultrapasa jogu kualifikasaun liga juvenile Timor-Leste sub 16.

“Ho ida ne’e ami perpara dadauk ona jogadór sira nian mentalidade no tekniku  jogadór sira la’o ho di’ak. Maske ami la iha treinadór maibé diretór tekniku klube Relay Laleia  nafatin kontrola”, informa Nia.

Nia esplika, “Ha’u rasik mak iha esperensia durante ne’e, ha’u aprende iha Díli no ha’u lori mai fahe ba jogadór sira. Ami  agora hakarak koko atu tuir liga kualifikasaun ne’e, atu hala’o liga juvenil ne’e iha fulan Agustu. Entaun liga kualifikasaun ita tenke preparasaun di’ak para bele tuir liga juvenil iha primeira divizaun  sub-16 nian”, tenik Nia.

Nune’e tuir planu klube futeból husi Munisipiu Manatuto ne’e, iha tempu badak sei ba hasoru Sekretáriu Estadu Juventude no Desportu (SEJD) hodi husu apoia moral no seluk tan. Dvo

Leave a Reply

Your email address will not be published.