PR Lú Olo Husu Veteranu Ajuda Governu Dezenvolve Turizmu Istóriku
Naunil Media (Díli), PrezidenteRepúblika (PR), Francisco Guterres ‘Lú Olo’ husu veteranu sira ajuda governu hodi dezenvolve seitór turizmu istórisku sira ne’ebé mak iha nasaun Timor-Leste.
Xefe Estadu Timor-Leste apela kestaun ne’e liu husi nia diskursu durante ambitu selebrasaun loron veteranu sira-nian tinan 2020 ho tema ‘Haree ba memória, relembra ita-nia pasadu, reafirma ita-nia prezente no projeta ita-nia futuru’, iha Praça de Proclamação, Tersa (03/03).
“Hau aproveita loron veteranu sira-nian, hodi husu tan buat tolu ba Konsellu Kombatentes Libertasaun Nasionál (KKLN), atu haree ba pontu tolu, husi pontu primeiru, grava lalais istóriku husi kombatente ida-idak ne’ebé sei moris tanba ita lakon ona ema barak iha tempu ukun-an. Bainhira ida mate, ita lakon dadaun parte ida husi ita-nia istória koletivu. Pontu segundu ajuda eduka ita-nia ema atu respesita konstituisaun RDTL no hametin valores no prinsípius luta libertasaun nasionál nian. Pontu datolu nian, ajuda governu atu dezenvolve lalais turizmu istóriku”, Xefe Estadu Prezidente Repúbliu, Francisco Guterres ‘Lú Olo’ hato’o liu husi nia diskurusu.
Xefe Estadu Lú Olo, husu ba sidadaun hotu-hotu tenke hakru’uk ba memória no heroi sira ne’ebé sakrafika-an ba luta indendensia Timor-Leste nian tanba liu husi sira luta mak ohin hetan ona independensia totál.
“Ohin, iha fatin istóriku (palasiu governu-antiga governadór português) ida ne’e, ha’u husu ba hotu-hotu hakru’uk ba memória hotu-hotu nian, feto no mane, tanba iha lista rohan-laek, ha’u temi de’it naran balu, Prezidente Nicolau Lobato, Rosa Muki, Borja da Costa, Maria Tapó, Vicente Sa’he, Soimali, Maria Goretti Joaquim, Hodu Ran Kadala, Sabalae, David Alex no Nino Konis Santana”, PR Lú Olo husu sidadaun sira.
Molok PR Lú Olo hakotu nia diskursu nia dehan, “sidadaun hotu-hotu nian kontribuisaun mak ita manán ukun rasik-an. Hamutuk ita sei luta nafatin ba futuru di’ak ba ita-nia oan no beioan sira. Iha ita-nia Timor Leste livre no independente”.
Observasaun Naunil Media iha serimónia selebrasaun loron veteranu sira-nia nota katak, maske loron manas komunidade no sidadaun sira ne’ebé mak asiste diretamente iha serimónia ne’e sira la sente kolen hodi hamrik no partesipa nafatin to’o hasa’e bandeira nasionál remata.
Iha serimónia selebrasaun loron veteranu sira-nia içar bandeira, korpu içar bandeira loron veteranu sira-nia no Hino Nasionál husi estudante Universidade Nasionál Timor Lorosa’e (UNTL). Korpu parade husi Forsa Falintil Defeza Timor Leste (F-FDTL), Polísia Nasional (PNTL) no grupu dram band husi estudante São Miguel.
Partesipan iha selebrasaun loron veteranu sira-nia hetan partisipa husi Prezidente Parlamentu Nasionál (PPN) Arão Noe de Jesus Amaral, Primeiru Ministru Taur Matan Ruak, Prezidente Triunal Rekursu Deolindo do Santos, Xefe Estadu Maior Jeneral F-FDTL, Maijór Jeneral Lere Anan Timur, Eis Primeiru Ministru Marí Alkateri, Eis Prezidente Repúblika José Manuel Ramus Horta, deputadu/a no menbru VIII governu.
Remata içar bandeira iha Prasa Proklamasaun Independensia kontinua ho atividade long march la’o ain bá Centru Convenções Díli (CCD). Rute husi long march ne’ehahú husi fatin serimónia ba Kolmera, Kaikoli remata CCD.
Atividade long march hahú tuku 10 dader partisipa husi Prezidente Parlamentu Nasionál (PPN) Arão Noe de Jesus Amaral, Primeiru Ministru Taur Matan Ruak, Xefe Estadu Maiór Jenerál F-FDTL, Maijór Jenerál Lere Anan Timur, menbru F-FDTL no PNTL, deputadu/a husi V lejislativu, menbru VIII governu no veteranu inklui povu. Apm