Indizita Xanana Ba PM, PLP Konsidera Viola KRDTL
Naunil Media (Dili), Vise-Prezidenti Bankada Parlamentár Partidu Libertasaun Popular (PLP), Francisco de Vasconcellos, hatete koligasaun foun indizita Kay Rala Xanana Gusmão ba Primeiru Ministru (PM) atu lidera governasaun da-sia, ne’e konsidera viola kontituisaun Repúblika Domokrátika Timor-Leste (KRDTL) iha Artigu 106.
Francisco de Vasconcellos, deklara asuntu ne’e ba jornalista sira liu hosi komunikadu imprensa, iha bankada PLP Parlamentu nasionál, Kinta (12/3).
“Ha’u rona horseik (Read-Tersa (10/03)), koligasaun foun lori ona karta audensia daruak nian ba Prezidente Repúblika (PR) atu halo audensia, nomós partidu koligasaun foun indizita ona Xanana ba Primeiru Ministru governasaun da-sia nian. Ida ne’e sira viola ona KRDTL iha artigu 106”, informa Vise-Prezidente Bankada PLP, Francisco de Vasconcellos.
Atual deputadu iha Quinto lejislatura ne’e esplika, KRDTL iha artigu 106 iha aliña 1 hatete, Primeiru Ministru hili hosi partidu ida ne’ebé iha votu barak liu ka hosi aliansa partidu sira-ne’ebé iha nia ema barak iha parlamentu no iha nomeasaun hosi Prezidente-Repúblika, hafoin rona tiha partidu polítiku sira ne’ebé reprezentante sira iha Parlamentu Nasionál.
“Koligasaun foun nusa mak indizita Primeiru Ministru, ba PLP katak ida ne’e tentativa golpe hasoru estadu, tanba ita labele indizita uluk Primeiru Ministru, kuandu Primeiru Ministru ida seluk sei iha”, tuir deputadu ne’e.
Nia hatutan, koligasaun foun atu indizita Primeiru Ministru, tenke konprova hodi hatudu ba Prezidente Repúblika katak, partidu maiória mak ida ne’ebé, hodi tuir KRDTL artigu 106.
Tuir Nia, meza parlamentu nasionál iha V lejislatura ne’e kompostu husi PLP, CNRT, KHUNTO, PUDD no UDT/FM , hatudu katak koligasaun foun tenke halo distribuisaun ba meza parlamentu nian, hafoin bele fó garantia ba Prezidente Repúblika iha maioria ida mak indizita Primeiru Ministru.
NIa esplika liu tan, regra jurídika iha Timor-Leste la iha difinisaun kona-ba governu gestaun, maibé governu ida agora ne’e planea poder no laiha orsamentu jerál estadu (OJE) dadaun VIII governu la’o ho duadesimu to’o OJE hetan aprova fali.
“To’o agora Prezidente Repúblika seidauk dekreta pedidu demisaun husi Primeiru-Ministru nian no mantein nafatin meza parlamentu nasionál. Dadaun ne’e situasaun la’o normál hela, tanba ne’e ami dehan tentativa golpe estadu”, dehan Nia.
Iha Tersa (25/02) ne’e, aktual Primeiru Ministru Taur Matan Rua husu ona demisaun ba Prezidente Repúblika (PR) Francisco Guterres ‘Lú Olo’, Maibé to’o oras ne’e Prezidente Repúdlika rasik seidauk dekreta. Uar
