DOMINGO RAMOS SABEDORIA ATU AKUMULA EMA HOTU

Naunil Media, (Díli), Semana santa ne’ebé liga entre Cristo nia paixão no resurreição, komesa ho domingo ramos. Iha liturjia no mós iha katakeze paixão no resurreição sai (conf. Litterae Circules De Festis Paschalibus Praeparandis et Celebrandis).

Iha loron domingo ramos sarani sira relembra hikas loron ne’ebé Jesus tama ba Jerusalem. Tuir Evangelho Mateus, profeta Zacarias predisse tiha ona Jesus nia chegada iha Jerusalem (Mat 21:5). Iha versaun Mateus, Jesus sa’e kuda burro rua (inan ho nia oan). Tuir Evangelho Marcos, Jesus tama ba Jerusalem ho kuda burro ida-ne’ebé ema nunka sa’e (Mar 11: 1-10).

Hosi versaun rua ne’e, independentemente hosi eksegese biblika, ba ha’u-ata nu’udár sarani ne’ebé mak koko atu kumpreende bíblia, iha bu’at balun mak ha’u-ata hetan:

Ba Liurai ida, kuda burro la’os animál ida-ne’ebé adekuadu hodi uza nu’udár transporte, ho razaun rua: primeiro, kompara ho kuda babain, kuda burro ne’e animál ne’ebé “beik” ka “ulun-toos” no segundo,  animál ne’ebé la’o neneik tebes;

Tuir versaun Mateus, Jesus sa’e ka uza kuda rua ne’e hotu. La hatene karik uza karruajem ka lae. Maibé ida-ne’e, impossivel tanba, atu kontrola kuda burro ida de’it susar tiha ona, sa tan rua.

Husi versaun rua ne’e, iha valór balun ke ha’u-ata bele foti:

Primeiro, dala barak, nu’udár ema babain ita sempre hili bu’at ne’ebé di’ak no fásil, atu nune’e, ajuda ita iha ita nia moris. Maibé, Jesus hanorin atu hili no muda bu’at ne’ebé susar, bu’at ne’ebé toos hodi sai fali ita nia forsa.

Segundo, dala barak, nu’udár ema babain susar atu tau hamutuk hanoin ne’ebé kontra malu. Susar atu nune ulun rua ne’ebé toos, maibé Jesus hanorin ita katak, wainhira tama ho vontade no domin, ita bele tau hamutuk hanoin ne’ebé kontra malu. Bele muda ulun rua ne’ebé toos sai unidu no iha harmonia.

Hakerek-Nain: José Boavida Simões

Faculdade de Direito da UNTL

RENETIL, REGIÃO AITANA-BALI

++++++++ Feliz Domingo De Ramos ++++++++