Eletrisidade Mate Derepente, PN Adia Debate OJF
Naunil Media (Díli), Prezidente Parlamentu Nasionál (PPN), Arão Noe de Jesus da Costa Amaral, hateten kauza hosi ahi (eletrisidade) mate derepente, diskusaun ba proposta alterasaun lei jestaun finanseira (LJF), parlamentu nasionál deside tenke adia ba loron aban Tersa (24/03) tanba fó impaktu ba kontinuasaun votasaun ba lei refere labele kontrola votu.
PPN, Arão Noe de Jesus da Costa Amaral, ba jornalista sira hafoin ensera diskusaun ba lei jestaun finanseira iha parlamentu nasionál (PN), Segunda (23/03).
“Hau hakarak dehan katak lahatene depois ami check ami nian mike (mikrofon) ahi derepente mate tiha. Ami konfirma failansu ne’e iha ne’ebé tanba ne’e ami adia de’it ba aban (24/03) dadersan nove oras, para ahi moris ita bele vota i kontajen de votu ne’e diak se lae bele hamosu konfuzaun” hateten PPN, dehan Arão Noe.
Nia hatutan parlamentu nasionál iha jeradór maibe avaria kleur ona no to’o agora seida’uk halo manutensaun.
“Jeradór ida iha maibe dehan avaria ona kleur, maibe la halo manutensaun tamba ahi normal tiha ona, sira la halo manutensaun to’o agora, maibe foin diskusaun ahi mate derepente mak foin ita senti, maibe la iha informasaun ruma senti lamentavel tebes”, dehan Arão.
Proposta alterasaun lei jestaun finanseira ne’e governu submete ba parlamentu nasionál iha loron 18 fulan Marsu ne’e no iha loron 19 fulan Marsu despaixa kedas ba komisaun C ne’ebe trata asuntu finansa públiku iha parlamentu nasionál halo pareser no ohin Segunda (23/03) halo diskusaun maibe la konsege halo votasaun ba jeneralidade tamba ahi mate, nune’e tenke adia ba Tersa (24/03). Uar
