TLPU-AJTL Husu MS Fó Tratamentu Di’ak Ba Jornalista Sira

Fahe Tutan

Naunil Media (Díli), Timor-Leste Press Union (TLPU) ho Asosiasaun Jornalista Timor-Leste (AJTL) husu Ministériu Saúde (MS) atu fó tratamentu di’ak ba jornaslista sira ne’ebe hala’o aktividade kobertura hodi responde direitu públiku informasaun kona-ba COVID-19.

TLPU ho AJTL hato’o asuntu ne’e liuhosi konferénsia imprensa konjunta mak hala’o iha edifisiu Tatoli, Faról, Kinta (26/03).

“Komisaun COVID-19 ne’ebé lidera direta hosi Ministériu Saúde tenke halo tratamentu justu ba jornalista ka media hotu-hotu, tantu mídia públiku ka privada. Baninhira komisaun covid-19 atu realiza konferénsia imprensa ruma atu hato’o informasaun ruma ba públiku relasaun ho Covid-19, ami husu para tenke konvida eh fó informasaun ba media hotu-hotu, tratamentu iguál tantu media públiku no privada atu bele asesu ne’ebe hanesan”, hateten Portavóz Asosiasaun Jornalista, Zevonia Vieira.  

Porta Voz Zevonia hatutan,  asosiasaun jornalista timor oan sujere ba Ministériu Saúde kria mos sentru mídia ba COVID-19, atu nune’e bele fornese informasaun loloos no kle’an ba mídia durante périodu provokasaun COVID-19.

Aleide ne’e mos asosiasaun jornalista afirma, ba ekipa komisaun COVID-19 atu respeitu indepedénsia redasaun kanál sira hotu-hotu no labele orienta fali kanál mídia sira atu halo-tuir interrese seluk nian.

“Media ka meiu komunikasaun sosiál sira atu ho sériu prepara ekipamentu protesaun ba jornalista sira, bainhira halo kobertura iha espasu públiku, hodi nune’e labele fó risku ba jornalista sira-nia moris. Fó kondisaun di’ak ba jornalista sira bainhira halo ninia knaar jornalizmu iha terenu, liuliu iha périodu moras COVID-19 nian”, afirma porta voz ne’e.

Nia mos husu ba jornalista sira mak hamahan-aan iha AJTL ho TLPU tenke nafatin hakruk ba kódigu étika jornalístiku, bainhira halo kobertura ba corona virus, no redasaun no jornalista sira hotu halo konfirmasaun no verifikasaun ba informasaun sira, tantu informasaun ofisiál hosi governu no mós informasaun sira ne’ebé públika iha media sosiál antes halo públikasaun.

 “Asosiasaun Jornalista Timor Lorosa’e no Timor-Leste Press Union kontinua hakilar no promove liberdade imprensa no espresaun iha Timor-Leste,” dehan Porta Voz ne’e.

TLPU no AJTL realiza  konferénsia imprensa ne’e, relasiona ho tratamentu Vise-Ministra Saúde Primária, Élia António Araújo dos Reis Amaral iha kualidade nu’udar Ministra Saúde Interina, ba jornalista sira antes ne’e. Fet/Flo

Leave a Reply

Your email address will not be published.