Prezidente Komisaun A PN, Joaquim : “Devér PN Halo Lei, Maibe Labele Kontra Direitu Fundamental Sira”
Naunil Media (Díli), Prezidente Komisaun A iha Parlamentu Nasionál (PN) trata asuntu konstituisionais no justisa, Joaquim dos Santos, hateten prinsípiu fundamental ba estadu Timor-Leste mak estadu Direitu Demokratiku, tanba ne’e governu no Parlamentu Nasionál (PN) iha dever halo lei maibé labele kontra fali direitus fundamental sira iha konstituisaun Republika Demokratika Timor-Leste hodi hamate fali ema nia liberdade.
“Ita nia prinsipiu fundamental ba estadu direitu demokratiku, siknifika ita nia hahalok hotu bajeia ba lei, mas keta haluha, lei ne’ebé governu produs ka parlamentu produs karik labele viola fali direitu seluk, tanba ne’e mak parlamentu atu hasai lei ida ka proposta lei ida husi governu, prozetu lei ruma husi deputadu sira tenke hare garantia husi konstitusionais ne’ebé rezerva liberdade de espresaun, liberdade de organizasaun, no liberdade de hondra tanba ne’e lei ne’ebé atu hamosu ne’e labele kontra prinsipiu fundamental sira”, hateten Prezidente Komisaun A, Joaquim dos Santos, ba jornalista sira iha PN, Kuarta (10/06).
Nia hatutan, kualker lei mak PN no Governu atu kria labele taka dalan ba ema seluk nia direitu fundamental tuir konstituisaun Republika Demokratika Timor-Leste.
“Lei ne’ebé atu hamosu ne’e labele viola fali prinsípiu fundamental sira, laos dehan halo lei ne’e taka dalan fali ba ema labele halo nia espresaun kualker desizaun polítika, ne’ebé halo ba lei tenke respeita inperativu konstitusionais ne’ebé proteze sidadaun nia direitu”, tenik deputadu Jiaquim.
Ikus liu, deputadu ne’e dehan, komisaun A trata asuntu konstitusionais no justisa sei hein hela esbosu lei ne’ebe oitavu governu, konstitusional liuhosi Ministériu Justisa, to’o mai komisaun sei haree kuandu la nesesáriu konstituisaun sei hasai, tanba kria lei ida labele kontra konstituisaun hodi hamate ema nia direitu fundamental ba liberdade iha nasaun ne’e. Uar
