PR Lú Olo: Governu Halo Levantamentu Ba Dezastre Naturál Iha Díli
NAUNIL MÍDIA (Díli), Prezidente Repúblika (PR) Francisco Guterres ‘Lú Olo’ husu governu atu halo levantamentu ida ne’ebé ho loloos ba komunidade afetadu sira husi dezastre Naturál nomos indentifika ba populasaun hira mak lakon vida mate.
Prezidente Repúblika (PR) Francisco Guterres ‘Lú Olo’ ba jornalista sira liuhusi komunikadu imprensa, iha Palásiu Prezidente Nicolau Lobato, Bairru Pité, domingu 04/04/.
“Ha’u hein katak iha situasaun ida ne’e nian laran guvernu sei bele halo levantamentu ida para bele hatene loloos dezastre ne’e fó preozuiju hira ba ita nia populasaun sira nomós mate hira ba populasaun sira? Sé ben ke iha informasoens ba dala uluk liu hatete ona katak nain 9 mak mate, bele liu tan ida ne’e maibé governu tuir mai sei halo levantamentu de dadus para atu bele hatene loloos i oinsá mak guvernu bele haree para atu ajuda populasaun sira ne’e”, dehan Xefi estadu.
Xefe Estadu ne’e hatutan, ba povu tomak iha Timor-Leste i partikularmente ba populasaun kapitál Díli nian ne’ebé hotu-hotu sofre dala ida tan indundsaun (bencana) dezastre boot ida hahú desde hori kalan to’o madrugada ohin dadersan tuku 2 to’o mai, ohin ne’ebé udan boot hodi rezulta inundasaun iha kapitál Díli.
Lú Olo mós kompara, dezastre boot ne’e hanesan kalamidade ida hanesan kalamidade Corona Virus ne’ebé infrenta kalamidade seluk mosu tan hodi hamosu hela terus ba ita nia povu.
“Ha’u fiar katak husi dezastre boot ida ne’e husi dezastre naturál ida ne’e husik hela tan terus boot ba populasaun iha kapitál Dili hanesan mós iha fatin sira seluk ne’ebé hetan situasaun hanesan situasaun ida ne’e. ha’u bele kompara hanesan mós kalamidade boot ida kalamidade ida seluk mak Corona Virus ne’ebé ita sei infrenta hela dadauk maibé mosu tan kalamidade ida ne’e hodi husik hela terus ba ita nia povu liu liu ba sira hotu ne’ebé mak familia sira hetan mate”. Nia realsa.
Nia dehan, husi komunikadu ne’e Prezidente Repúblika hakarak hakarak hato’o ninia sentidu pesmuz ba família sira ne’ebé mak lakon iha inundasaun ida ne’e no mós manifesta nia solidariedade tomak ba populasaun kapitál Díli no ba povu tomak iha Timor-Leste nian.
“Dezastre ida ne’ebé akontese iha Díli ho ida ne’e ba dala rua, uluk iha tinan kotuk kona nomós ohin kona fila fali iha sidade Díli dezastre ida ne’e lori para hotu hotu tenke halo reflesaun ida seriu liu liu kona ba ukun durante tinan 10 ninian. Ha’u lakohi fó sala ba ema ida nen fo sala ba ukun nain sira, maibé ha’u hakarak husu de’it para hotu-hotu halo reflesaun ida seriu, Oinsá mak atu bele hadia kapitál ida ne’e para atu labele fo dezastre fó susar ida ne’e nafatin ba povu”. Nia informa.
Ikus Prezidente Repúblika Lú Olo hato’o, dezeja boas paskoa ba povu Timor Leste liuliu populasaun kapitál Díli, “Povu doben Timor-Leste partikularmente ba populasaun iha kapitál Díli Timor-Leste ninian mak ha’u hadomi no respeitu tebe-tebes uluk nain hakarak atu hato’o ha’u boas paskoa ba imi hotu i deseza katak ho nain Jesus nia resurisaun bele fo nia bensaun tomak fila fali ba ita hotu ba Timor oan sira hotu”. tenik PR. *jos/pau.
