PR Lú Olo Husu Australia, Xina no Kuba Reforsa Apoiu Kombate COVID-19

Naunil Media (Díli), Prezidente Repúblika (PR), Francisco Guterres ‘Lú Olo’, agradese apoiu sira ne’ebé hetan tiha ona no husu nafatin ba Australia, Kuba no Xina atu reforsa tan kooperasaun ba kombate Virus Corona.

Pedidu ne’e Xefe Estadu Timor-Leste, Lú Olo hato’o liuhosi Komunikadu Imprensa mak Naunil Media asesu hosi Pájina Ofisiál Presidência da República Democrática de Timor-Leste, Segunda (30/03).

Prezidente Repúblika (PR), Francisco Guterres ‘Lú Olo’, hateten Nasaun sira iha mundu ohin loron luta hasoru inimígu globál Virus Corona, ka  koñesidu ho Covid-19, balu iha liu rekursu, maibé nasaun balu lae. Nasaun ida-idak halo preparasaun hasoru pandemia Covid-19.

“Ba Governu Australia nia apoiu instala laboratóriu ba teste Covid-19 no formasaun ba pesoál saúde, Prezidente Repúblika hato’o agradesimentu ba tulun ne’e.  Ho apoiu ne’e, Timor-Leste iha kbiit atu prevene no kombate COVID-19 ho lalais tanba la presiza haruka tan teste ran ba Australia. Prezidente Repúblika sei konta nafatin apoiu husi Governu Australia ninian iha luta hasoru Covid-19”, hateten Xefe Estadu Timor-Leste no Símbolu Unidade Nasionál, Lú Olo.

Investimentu Kubanu iha área saúde, ohin loron rekoñesidu internasionalmente husi ninia medikemantus no Brigada Médiku ne’ebé haruka ba nasaun barak.  Medikamentus ne’ebé uza ba hasa’e imunidade hasoru Covid-19 susesu tebes.  Tanba ne’e Prezidente Repúblika reforsa pedidu husi VIII Governu Konstitusionál  husu asisténsia medikamentu husi Kuba no reforsa Brigada Médika Kubanu iha Timor-Leste.

Prezidente Repúblika fiar katak Governu Kuba sei hatan pedidu husi Timor-Leste atu enfrenta efeitu husi Virus Corona.

Prezidente Repúblika felisita Xina ba maneira kombate Covid-19 no asisténsia ne’ebé fó ba nasaun sira afetadu maka’as ho moras ne’e tanba ho kualifikasaun rekursus umanus, medikamentu no instalasaun.

Estadu halo esforsu prevensaun no preparativus  hasoru kondisaun at liu, tanba ne’e, Prezidente Repúblika reforsa pedidu apoiu ekipamentu no medikamentus husi Governu ne’ebé hato’o tiha ona ba Repúblika Popular Xina.

Governu Timor-Leste sei responsabiliza ba kustu sosa ekipamentu, medikamentu no transportasaun.

Timor-Leste, liuhusi Ministra interina Saúde deklara kazu pozitivu Covid-19 na’in-ida iha 21 marsu 2020.

Prezidente Repúblika dekreta Estadu Emerjénsia hahú husi 28 marsu ba durasaun fulan ida. Haree husi esperiénsia nasaun seluk nian ne’ebé tarde foti medida preventiva restritu, Estadu foti desizaun ne’e nu’udar dalan di’ak liu ba prevensaun Covid-19 atu salva sidadaun tomak  ne’ebé hela iha nasaun ne’e. Deklarasaun Estadu Emerjénsia atu proteje ema no la husik Covid-19 harahun ema ida-idak no Povu no País.  

Governu forma tiha ona Komisaun Interministérial ba Covid-19 ho apoiu husi Organizasaun Mundiál Saúde ba prevensaun no kombate moras ne’e iha Timor-Leste.  

Iha portu entrada  sira, Governu harii ekipa  tau matan ba sidadaun hotu-hotu ne’ebé tama mai Timor-Leste. Governu harii fatin kuarentena, izolamentu no medikamentus.

Iha 28 marsu, Konsellu Ministru aprova medidas ba regulasaun Estadu Emerjénsia no hahú halo sosializasaun atu sidadaun hotu-hotu bele kumpri. Mídia PR